دنیائے کرکٹ کے 14 سابق کپتانوں کا حکومتِ پاکستان کے نام کھلا خط، عمران خان کی صحت پر تشویش

دنیائے کرکٹ کے 14 سابق عظیم کپتانوں نے حکومتِ پاکستان کے نام ایک کھلا خط جاری کرتے ہوئے سابق وزیر اعظم اور ورلڈ کپ فاتح کپتان عمران خان کی صحت پر تشویش کا اظہار کیا ہے۔

خط پر دستخط کرنے والوں میں بھارت کے سابق کپتان Sunil Gavaskar، Kapil Dev، آسٹریلیا کے Greg Chappell، انگلینڈ کے Nasser Hussain اور Michael Atherton جبکہ آسٹریلیا کے لیجنڈری کپتان Steve Waugh سمیت دیگر معروف نام شامل ہیں۔

سابق کپتانوں نے اپنے خط میں کہا ہے کہ عمران خان ایک عالمی آئیکون ہیں جنہوں نے نہ صرف پاکستان بلکہ عالمی کرکٹ میں بھی نمایاں خدمات انجام دیں۔ انہوں نے مطالبہ کیا کہ عمران خان کو فوری طور پر ماہر ڈاکٹروں سے طبی معائنہ کروایا جائے اور انہیں بین الاقوامی معیار کے مطابق طبی سہولیات فراہم کی جائیں۔

خط میں جیل کے دوران عمران خان کی نظر متاثر ہونے سے متعلق رپورٹس پر افسوس کا اظہار بھی کیا گیا ہے۔ سابق کرکٹرز کا کہنا تھا کہ میدان کی رقابت اپنی جگہ مگر انسانیت، احترام اور بنیادی حقوق ہر حال میں مقدم ہونے چاہئیں۔

واضح رہے کہ اس خط پر دستخط کرنے والے 14 سابق کپتانوں کی فہرست میں کوئی پاکستانی کرکٹر شامل نہیں ہے۔