اسلام آباد انٹرنیشنل ایئرپورٹ مکمل طور پر کیش لیس نظام پر منتقل

اسلام آباد: پاکستان ائیرپورٹس اتھارٹی نے اعلان کیا ہے کہ اسلام آباد انٹرنیشنل ایئرپورٹ اب مکمل طور پر کیش لیس نظام پر منتقل ہو گیا ہے، جس کے تحت تمام کاؤنٹرز پر مسافروں کے لیے جدید کیش لیس سہولت دستیاب ہوگی۔

اب مسافر موبائل ایپ کے ذریعے تمام فیس اور چارجز ادا کر سکیں گے، جس سے تیز اور آسان سفری عمل یقینی بنایا گیا ہے۔ پاکستان ائیرپورٹس اتھارٹی نے بتایا کہ جدید ٹیکنالوجی کے استعمال سے ایئرپورٹ سروسز مزید مؤثر بنائی جائیں گی، شفافیت میں اضافہ ہوگا اور مسافروں کے لیے آسان، محفوظ اور جدید ادائیگی کا نظام متعارف کرایا گیا ہے۔

یہ اقدام مسافروں کو ترجیحی بنیادوں پر سہولت فراہم کرنے اور ایئرپورٹ کے تمام عمل کو ڈیجیٹل اور جدید خطوط پر منتقل کرنے کے مشن کے تحت کیا گیا ہے۔