بجلی نرخوں میں مجوزہ تبدیلیوں پر آئی ایم ایف اور پاکستان میں مشاورت

عالمی مالیاتی فنڈ (آئی ایم ایف) نے کہا ہے کہ پاکستان کے ساتھ بجلی کے مجوزہ ٹیرف میں ممکنہ ردوبدل کے حوالے سے بات چیت جاری ہے۔

نجی ٹی وی کے مطابق آئی ایم ایف حکام نے میڈیا سے گفتگو میں تصدیق کی کہ حکومت پاکستان کے ساتھ مختلف آپشنز پر تبادلہ خیال کیا جا رہا ہے، اور اس بات پر خصوصی توجہ دی جا رہی ہے کہ ٹیرف میں کسی بھی ممکنہ اضافے کا بوجھ متوسط اور کم آمدنی والے طبقات پر نہ پڑے۔

آئی ایم ایف حکام کے مطابق مذاکرات میں توانائی کے شعبے میں اصلاحات کے ساتھ ساتھ سماجی تحفظ کے پہلوؤں کو بھی مدنظر رکھا جا رہا ہے تاکہ کمزور طبقات کو ریلیف فراہم کیا جا سکے۔ مجوزہ ٹیرف ترامیم کا جائزہ اس بات کے تناظر میں بھی لیا جائے گا کہ آیا یہ حکومتی وعدوں اور جاری معاشی پروگرام کے اہداف سے مطابقت رکھتی ہیں یا نہیں۔

ذرائع کا کہنا ہے کہ مجوزہ ٹیرف میں ردوبدل کے ممکنہ اثرات، بشمول مہنگائی، عوامی اخراجات اور مجموعی معاشی استحکام، تفصیلی طور پر جانچے جائیں گے۔ آئی ایم ایف کے مطابق توانائی کے شعبے میں پائیدار اصلاحات اور معاشی استحکام کے درمیان توازن قائم رکھنا مذاکرات کا ایک اہم حصہ ہے۔