’دھرندھر 2‘ کا ٹیزر جاری، رنویر سنگھ کے کردار نے مداحوں کو متاثر کر دیا

ممبئی: بالی ووڈ کی پروپیگنڈہ فلم دھرندھر کے سیکوئل ’دھرندھر 2 دی ریونج‘ کا ٹیزر جاری کر دیا گیا ہے، جس میں مداحوں نے رنویر سنگھ کے کردار کو بے حد سراہا۔

ادیتیا دھَر کی ہدایت کاری میں بننے والی سپائی تھرلر فلم دھرندھر، جس نے باکس آفس پر دھوم مچا دی تھی، اب اپنے دوسرے حصے کے ساتھ واپس آ رہی ہے۔

فلم کا ایک نیا پوسٹر بھی ریلیز کیا گیا ہے، جس میں رنویر سنگھ خون میں لت پت انداز میں نظر آ رہے ہیں، اور بارش میں سرخ روشنی کے نیچے کھڑے دکھائی دیتے ہیں جو خون کی بارش کا تاثر دیتی ہے۔ رنویر سنگھ نے پوسٹر سوشل میڈیا پر شیئر کرتے ہوئے لکھا:
“اب بگڑنے کا وقت آ گیا ہے، ’دھرندھر دی ریونج‘ دنیا بھر کے سینما گھروں میں 19 مارچ 2026 کو ریلیز ہوگی، جو ہندی، تیلگو، تامل، کنڑ اور ملیالم زبانوں میں دستیاب ہوگی۔”

فلم کی کہانی ایک بھارتی جاسوس کے پُرتشدد مشن کے گرد گھومتی ہے جو پاکستان میں خفیہ طور پر داخل ہو کر وہاں کے جرائم پیشہ گروہوں میں شامل ہو جاتا ہے۔ اگرچہ فلم باکس آفس پر کامیاب رہی، تاہم اس کی سیاست اور حقیقی واقعات کی منتخب انداز میں عکاسی پر تنقید بھی ہوئی۔

دھرندھر کی سنسنی خیز جاسوسی کہانی، پُرتشدد ایکشن مناظر اور رنویر سنگھ و اکشے کھنہ کی شاندار اداکاری نے اسے سٹریمنگ ناظرین کے لیے ایک دلچسپ تجربہ بنایا، جس کے باعث سیکوئل سے توقعات خاصی بلند ہیں۔