قومی اسمبلی میں بجٹ کی منظوری کا عمل آج باضابطہ طور پر شروع ہوگا

وزیر خزانہ محمد اورنگزیب قومی اسمبلی میں 104 کھرب 14 ارب روپے سے زائد کے 135 مطالبات زر منظوری کے لیے پیش کریں گے، جس کے ساتھ ہی قومی اسمبلی میں وفاقی بجٹ کی منظوری کا باضابطہ عمل آج سے شروع ہو رہا ہے۔ اس عمل کے دوران 43 کھرب 85 ارب روپے سے زائد کے 88 مطالبات زر بغیر کسی کٹوتی کی تحریک کے براہِ راست منظور کیے جائیں گے، جبکہ 60 کھرب 29 ارب روپے سے زائد کے باقی ماندہ 47 مطالبات زر پر اپوزیشن کی جانب سے کٹوتی کی مجموعی طور پر 587 تحاریک پیش کی جائیں گی۔

بجٹ دستاویزات کے مطابق، کابینہ سیکرٹریٹ اور اس کے ذیلی اداروں کے 19 مطالبات زر پر کٹوتی کی 91 تحاریک سامنے لائی جائیں گی، جبکہ توانائی ڈویژن کے 661 ارب 26 کروڑ روپے سے زائد کے 6 مطالبات پر کٹوتی کی 116 تحاریک پیش ہوں گی۔ اسی طرح وزارتِ خزانہ کے 42 کھرب 82 ارب روپے سے زائد کے مطالبات زر پر کٹوتی کی 100 تحاریک، اور وزارتِ داخلہ کے 74 ارب 35 کروڑ روپے سے زائد کے 4 مطالبات پر کٹوتی کی 123 تحاریک پیش کی جائیں گی۔ اس کے علاوہ، قومی اسمبلی کے اس اہم اجلاس میں تخفیفِ غربت ڈویژن کے 859 ارب روپے سے زائد کے 3 مطالبات زر پر بھی اپوزیشن کی طرف سے کٹوتی کی 45 تحاریک بحث کے لیے پیش کی جائیں گی۔