اسلام آباد مفاہمتی یادداشت کے تحت امریکہ ایران تکنیکی سطح کے مذاکرات آج سوئٹزرلینڈ میں ہوں گے

اسلام آباد مفاہمتی یادداشت کے تحت امریکہ اور ایران کے درمیان تکنیکی سطح کے اہم مذاکرات آج 21 جون کو سوئٹزرلینڈ کے شہر برگن سٹاک میں شروع ہو رہے ہیں، جس میں امریکہ، ایران، پاکستان اور قطر کے اعلیٰ ترین نمائندے شریک ہو رہے ہیں۔

مذاکراتی بیٹھک کے لیے فریقین کے وفود کی برگن سٹاک آمد کا سلسلہ تیزی سے جاری ہے اور ایرانی وفد بھی پارلیمنٹ کے اسپیکر محمد باقر قالیباف کی قیادت میں وہاں پہنچ چکا ہے، جسے ’میناب 168‘ کا باقاعدہ نام دیا گیا ہے۔ ایرانی میڈیا کے مطابق اس وفد میں وزیر خارجہ عباس عراقچی، ایرانی قومی سلامتی کونسل کے سینیئر عہدیدار علی باقری، ایرانی مرکزی بینک کے گورنر عبدالناصر ہمتی، کاظم غریب آبادی اور اسماعیل بقائی شامل ہیں۔ دوسری جانب امریکی وفد کی نمائندگی کے لیے صدر ٹرمپ کے خصوصی ایلچی اسٹیو وٹکوف اور ان کے داماد جیرڈ کشنر پہلے ہی سوئٹزرلینڈ میں موجود ہیں، جبکہ امریکی نائب صدر بھی جلد ان مذاکرات کا حصہ بنیں گے۔

اس تزویراتی بیٹھک میں پاکستان کی جانب سے وزیراعظم شہباز شریف اور چیف آف آرمی اسٹاف و چیف آف ڈیفنس فورسز فیلڈ مارشل عاصم منیر خود شریک ہو رہے ہیں، جو خطے کے امن اور اس تاریخی مفاہمت میں پاکستان کے کلیدی کردار کو ظاہر کرتا ہے۔