وفاقی وزیر صحت مصطفیٰ کمال: پاکستان 2031 تک ویکسین پروگرام خود خریدنے پر مجبور، خود کفالت ضروری ہے

اسلام آباد: وفاقی وزیر صحت مصطفیٰ کمال نے پریس کانفرنس میں کہا کہ انسانوں کو بیماریوں سے بچانے کا نظام ہیلتھ کیئر ہے اور ویکسین اس نظام کی بنیادی کڑی ہے۔

انہوں نے بتایا کہ اس وقت پاکستان میں 13 بیماریوں سے بچاؤ کے لیے ویکسین لگائی جا رہی ہیں اور صحت کے شعبے کو جدید خطوط پر استوار کیا جا رہا ہے۔

وزیر صحت نے کہا کہ جو ویکسین حکومت خریدتی ہے، اس کی قیمت تقریباً 4 سے 5 سو ملین ڈالر ہے، اور 2031 تک ویکسین پروگرام ختم ہو جائیں گے۔ اس کے بعد پاکستان کو یہ ویکسین خود خریدنی ہوں گی، جس پر 1.2 ارب ڈالر کا خرچ آئے گا۔

مصطفیٰ کمال نے کہا کہ پاکستان کو سک کیئر سے ہیلتھ کیئر کی طرف جانا ہوگا اور ویکسین بنانے میں خود کفیل ہونا ناگزیر ہے۔ انہوں نے مزید کہا کہ پاکستان کو خطے میں ویکسین ایکسپورٹ کا حب بننا چاہیے اور اس حوالے سے انڈونیشیا نے تیاری میں تعاون کی یقین دہانی کرائی ہے۔