اسلام آباد: مسلم لیگ ن کے سینیٹر عرفان صدیقی انتقال کر گئے

اسلام آباد: پاکستان مسلم لیگ ن کے سینیٹر، معروف کالم نگار اور پارلیمانی لیڈر عرفان صدیقی انتقال کر گئے۔ وہ اسلام آباد کے ایک نجی اسپتال میں زیرِ علاج تھے۔
عرفان صدیقی مارچ 2021ء میں سینیٹ کے رکن منتخب ہوئے اور ایوانِ بالا میں مسلم لیگ ن کے پارلیمانی لیڈر کی حیثیت سے خدمات انجام دے رہے تھے۔ ان کی مدتِ رکنیت مارچ 2027ء تک تھی۔
مرحوم کا شمار مسلم لیگ ن کے صدر نواز شریف کے قریبی ساتھیوں میں ہوتا تھا۔ وہ سینیٹ کی خارجہ امور کمیٹی کے چیئرمین تھے اور بزنس ایڈوائزری، انسانی حقوق، اطلاعات و نشریات، داخلہ اور انسدادِ منشیات سمیت متعدد اہم پارلیمانی کمیٹیوں کے رکن بھی رہے۔
صدرِ مملکت، وزیرِ اعظم، وزیرِ داخلہ، وفاقی وزرا، وزیراعلیٰ پنجاب مریم نواز، مسلم لیگ ن کے قائد نواز شریف اور دیگر سیاسی و سماجی شخصیات نے عرفان صدیقی کے انتقال پر گہرے دکھ اور افسوس کا اظہار کیا ہے۔ رہنماؤں نے کہا کہ ان کے جانے سے ایک بڑا خلا پیدا ہوگیا ہے، جو طویل عرصے تک پُر نہیں ہو سکے گا۔
پارٹی رہنماؤں نے مرحوم کی سیاسی و صحافتی خدمات کو خراجِ تحسین پیش کرتے ہوئے ان کے اہلِ خانہ سے اظہارِ تعزیت کیا ہے۔