خیبرپختونخوا : مالی شفافیت اور جدید حکمرانی کے لیے ڈیجیٹلائزیشن کا عمل تیز

سہیل آفریدی کی زیر صدارت ڈیجیٹل خیبرپختونخوا کے حوالے سے اجلاس منعقد ہوا، جس میں صوبے کے تمام امور کو بتدریج ڈیجیٹلائز کرنے کے اقدامات کا جائزہ لیا گیا۔

وزیر اعلیٰ سہیل آفریدی نے کہا کہ ڈیجیٹل پیمنٹ ایکٹ تیار کر لیا گیا ہے اور جلد اسے کابینہ سے منظوری کے لیے پیش کیا جائے گا۔ اس نظام کے تحت حکومت، عوام اور تاجروں کے تمام ادائیگی کے معاملات ڈیجیٹل کیے جائیں گے، جس کا مقصد مالیاتی امور میں شفافیت، سہولت اور مؤثریت کو یقینی بنانا ہے۔

اجلاس کو بریفنگ دی گئی کہ اب تک 170 مختلف سروسز کی نشاندہی کی جا چکی ہے جنہیں ڈیجیٹل نظام میں شامل کیا جائے گا، جن میں 14 سروسز کی ڈیجیٹلائزیشن مکمل ہو چکی ہے۔ ان میں انتقالِ جائیداد ٹیکس، جائیداد ٹیکس، اسلحہ لائسنس، ابیانہ، ڈرائیونگ لائسنس، پلاٹ رجسٹریشن، ایچ ای سی داخلہ اور شکار لائسنس فیس شامل ہیں۔ مزید 34 سروسز کو دسمبر 2025 تک ڈیجیٹائز کیا جائے گا، جس سے تقریباً 12.3 ارب روپے کی بچت متوقع ہے۔ جون 2026 تک تمام 170 سروسز کی مکمل ڈیجیٹلائزیشن مکمل کی جائے گی۔

وزیر اعلیٰ نے ہدایت کی کہ ڈیجیٹلائزیشن کی پیش رفت کا جائزہ لینے کے لیے ہر دو ہفتے بعد ریویو میٹنگ منعقد کی جائے۔ انہوں نے کہا کہ ہمارا مقصد خیبرپختونخوا کو معاشی طور پر خودکفیل اور جدید طرزِ حکمرانی کی مثال بنانا ہے۔