پاکستان جاپان مشترکہ مذاکرات کا آٹھواں اجلاس ، ٹوکیو میں تجارت و سرمایہ کاری پر بات چیت

ٹوکیو: پاکستان اور جاپان کے درمیان گورنمنٹ بزنس مشترکہ مذاکرات کے آٹھویں اجلاس کا انعقاد آج ٹوکیو میں ہوا۔ ترجمان پاکستانی سفارت خانہ ٹوکیو کے مطابق یہ اجلاس 2018 کے بعد پہلا موقع تھا جب یہ مذاکرات دوبارہ ٹوکیو میں منعقد ہوئے۔

اجلاس کی مشترکہ صدارت وزیرِاعظم کے کوآرڈینیٹر برائے تجارت و صنعت رانا احسان افضل خان اور جاپانی وزارتِ معیشت، تجارت و صنعت کے پارلیمانی نائب وزیر تاکوؤ کوموری نے کی۔ رانا احسان افضل خان نے پاکستانی وفد کی قیادت کی جبکہ جاپانی وفد کی نمائندگی تاکوؤ کوموری نے کی۔

اجلاس میں ٹوکیو میں پاکستان کے سفیر عبد الحمید بھی موجود تھے۔ دونوں ممالک کے سینئر سرکاری افسران اور نجی شعبے کے نمائندگان نے بھی مذاکرات میں شرکت کی۔

مذاکرات میں پاک جاپان اقتصادی تعاون کو فروغ دینے پر اتفاق کیا گیا۔ تجارت اور سرمایہ کاری کے ماحول کو بہتر بنانے کے لیے مختلف تجاویز پر تبادلۂ خیال ہوا جبکہ دونوں ممالک کے درمیان عملی اور فالو اَپ پر مبنی تعاون کو آگے بڑھانے پر زور دیا گیا۔