بنگلا دیش کی بیمان ایئرلائن کی کراچی کے لیے پروازیں ، باقاعدہ شیڈول جاری

پاکستان اور بنگلا دیش کے درمیان براہِ راست فضائی رابطے کی بحالی کے معاملے میں اہم پیش رفت سامنے آ گئی ہے۔ بنگلا دیش کی قومی ایئرلائن بیمان ایئرلائن نے کراچی کے لیے پروازوں کا باقاعدہ شیڈول جاری کر دیا ہے۔

ذرائع کے مطابق کئی سال بعد بیمان ایئرلائن کی پہلی براہِ راست پرواز 29 جنوری کو ڈھاکا سے کراچی روانہ ہوگی۔ ابتدائی طور پر ہفتہ وار دو پروازیں چلائی جائیں گی، اور بکنگ کھلتے ہی پہلی پرواز کی تمام نشستیں چند گھنٹوں میں مکمل ہو گئیں۔

براہِ راست فضائی رابطے کی بحالی پر پاکستان اور بنگلا دیش کے عوام میں خوشی کی لہر دوڑ گئی ہے۔ سول ایوی ایشن اتھارٹی نے اس سے قبل بیمان ایئرلائن کو براہِ راست پروازوں کی اجازت دی تھی۔ واضح رہے کہ گزشتہ ماہ پی آئی اے اور بیمان ایئرلائن کے درمیان کارگو کی نقل و حمل کے لیے بھی معاہدہ طے پایا تھا۔