اسلام آباد میں بنگلہ دیشی ثقافتی شام کا انعقاد، بنگالی موسیقی اور رقص توجہ کا مرکز رہے

پاکستان اور بنگلہ دیش کے درمیان ثقافتی اور سفارتی روابط کے فروغ کے لیے پاکستان نیشنل کونسل آف دی آرٹس (PNCA) اسلام آباد میں ایک پروقار اور رنگا رنگ ’بنگلہ دیشی ثقافتی شام‘ کا انعقاد کیا گیا۔

اس ایونٹ میں 15 رکنی بنگلہ دیشی ثقافتی وفد نے حصہ لیا جس نے موسیقی، انفرادی گائیکی اور روایتی بنگالی رقص پر مبنی دلکش پرفارمنسز پیش کر کے اپنے ملک کی ثقافتی رنگا رنگی کی خوبصورت عکاسی کی۔ تقریب میں وفاقی وزیر اورنگزیب خان کھچی، پاکستان میں بنگلہ دیش کے ہائی کمشنر محمد اقبال حسین خان اور سیکرٹری قومی ورثہ و ثقافت ڈویژن اسد رحمان گیلانی نے خصوصی شرکت کی۔

وفاقی وزیر اورنگزیب خان کھچی اور سیکرٹری اسد رحمان گیلانی نے بنگلہ دیشی فنکاروں کے فن کو سراہتے ہوئے کہا کہ ایسے اقدامات دونوں برادر ممالک کے عوام کو ایک دوسرے کی روایات اور مشترکہ تاریخ کو سمجھنے کا موقع فراہم کرتے ہیں۔ سیکرٹری ثقافت نے دونوں ممالک کے درمیان عوام سے عوام کے روابط (People-to-People Contacts) کو مزید مضبوط کرنے کے لیے براہِ راست فضائی رابطے بحال کرنے کی اہمیت پر بھی زور دیا۔ بنگلہ دیشی ہائی کمشنر محمد اقبال حسین خان نے حکومتِ پاکستان اور پاکستانی عوام کے پرتپاک استقبال پر شکریہ ادا کیا اور ثقافتی تعاون کے مزید فروغ کی امید ظاہر کی۔