بابوسر ٹاپ روڈ تین روزہ بندش کے بعد ٹریفک کے لیے بحال

گلگت بلتستان اور خیبر پختونخوا کے درمیان سفر کرنے والے شہریوں اور سیاحوں کے لیے بڑی خوشخبری سامنے آئی ہے کہ شدید برف باری کے باعث تین روز سے بند بابوسر ٹاپ روڈ کو نیشنل ہائی وے اتھارٹی (NHA) کی جانب سے برف ہٹائے جانے کے بعد ٹریفک کے لیے مکمل طور پر بحال کر دیا گیا ہے۔

این ایچ اے حکام اور پولیس کے مطابق بابوسر ٹاپ کے علاقے میں حالیہ شدید برف باری کی وجہ سے شاہراہ پر برف کی موٹی تہیں جم گئی تھیں، جس کے باعث دونوں اطراف سے ہر قسم کی آمدورفت معطل ہو گئی تھی۔ تاہم این ایچ اے عملے کی انتھک کوششوں کے بعد سڑک کو صاف کر کے گلگت اور مانسہرہ/کے پی کے دونوں اطراف سے گاڑیوں کی روانی بحال کر دی گئی ہے۔

حکام اور پولیس کی جانب سے جاری ہدایات کے مطابق بابوسر ٹاپ روڈ مسافروں کی حفاظت کے پیش نظر روزانہ شام 4 بجے تک ہی کھلی رہے گی، جبکہ شام 4 بجے کے بعد شدید دھند، کُہر اور برفانی پھسلن کے خطرات کی وجہ سے سڑک کو ٹریفک کے لیے بند کر دیا جائے گا۔ مسافروں اور سیاحوں کو ہدایت کی گئی ہے کہ وہ غیر یقینی موسمی صورتحال کے باعث سفر سے قبل سڑک کی تازہ ترین صورتحال لازمی معلوم کریں اور مقررہ اوقات کی پابندی کریں۔