چین: بچوں کو سیسہ آلود خوراک دینے کا الزام، نرسری کی مالکن سمیت 5 ارکان کو قید کی سزائیں

چین کی ایک عدالت نے نرسری سکول (کنڈرگارٹن) کی مالکن اور اس کے عملے کے پانچ ارکان کو 200 سے زائد بچوں کو سیسے (Lead) سے آلودہ زہریلی خوراک دینے کا جرم ثابت ہونے پر عمر قید اور سخت قید کی سزائیں سنا دی ہیں۔

چینی سرکاری ذرائع ابلاغ کے مطابق صوبہ گانسو کے شہر تیان شوئی میں واقع نرسری کی مالکن لی ہوئی فانگ کو غیر قانونی طور پر زہریلی اور انتہائی نقصان دہ خوراک تیار کرنے و فروخت کرنے کے جرم میں عمر قید کی سزا سنائی گئی ہے، جبکہ اس کے 500,000 یوان کے ذاتی اثاثے بھی ضبط کرنے کا حکم دیا گیا ہے۔

تفتیشی رپورٹ کے مطابق جولائی 2025ء میں نرسری کے 247 بچوں اور عملے کے ارکان کی طبعیت خراب ہونے پر جب طبی معاینہ کیا گیا تو ان کے خون میں سیسے (لیڈ) کی مقدار خطرناک حد تک زیادہ پائی گئی۔ تحقیقات سے انکشاف ہوا کہ نرسری کے باورچی کھانوں کی رنگت اور ظاہری شکل کو زیادہ دلکش بنانے کے لیے ناقابلِ استعمال اور زہریلے پینٹ (Paint) کو بطور فوڈ کلر استعمال کر رہے تھے، جس پر واضح طور پر تحریر تھا کہ اسے خوراک میں شامل کرنا سخت منع ہے۔