تائدہ سیکٹر اور اطراف میں افغان طالبان کی فائرنگ، پاک فوج کی کارروائی میں متعدد ہلاک

پاک افغان سرحد پر واقع تائدہ سیکٹر، اپر کرم اور غوزگڑھی کے سرحدی علاقوں میں افغان طالبان کی جانب سے بلااشتعال فائرنگ کی گئی، جس کے بعد پاک فوج کی جانب سے کی گئی بھرپور جوابی کارروائی میں افغان طالبان کو بھاری جانی و مالی نقصان پہنچا ہے اور متعدد اہلکاروں کی ہلاکتوں کی اطلاعات ہیں۔

سکیورٹی ذرائع کے مطابق افغان طالبان کی جانب سے یہ فائرنگ خارجی دہشت گردوں کو پاک افغان سرحد پار کرانے (دراندازی) کی کوشش کے دوران کی گئی۔ پاک فوج نے فوراً حرکت میں آتے ہوئے مؤثر جواب دیا اور اپر کرم سیکٹر میں آرٹلری فائر کے ذریعے افغان طالبان کی اہم ‘ٹاپسر پوسٹ’ اور ‘شپولا بیس کیمپ’ کو نشانہ بنایا۔ ذرائع کے مطابق پاک فوج کی گولہ باری سے شپولا بیس کیمپ مکمل طور پر تباہ ہو گیا ہے اور خوف و ہراس کے باعث طالبان اہلکار اپنی ایک سرحدی پوسٹ بھی خالی کر کے فرار ہو گئے ہیں۔

سرحدی علاقوں میں فائرنگ کا تبادلہ جاری رہنے کی اطلاعات ہیں۔ سکیورٹی ذرائع نے دہرایا ہے کہ پاک فوج ملکی خودمختاری، سرحدوں کی حفاظت اور علاقائی سلامتی کا دفاع کرنے کے لیے ہمہ وقت تیار اور پُروعزم ہے اور کسی بھی قسم کی دراندازی یا بلااشتعال جارحیت کا منہ توڑ جواب دیا جائے گا۔