فش پراڈکٹس کی برآمدات 568 ملین ڈالر تک پہنچ گئیں: وفاقی وزیر بحری امور

وفاقی وزیر برائے بحری امور جنید انوار چودھری نے انکشاف کیا ہے کہ پاکستان کی مچھلی اور دیگر سمندری مصنوعات (Fish Products) کی برآمدات تاریخی طور پر 568 ملین ڈالر تک پہنچ گئی ہیں، جو مقررہ سالانہ ہدف 500 ملین ڈالر سے 68 ملین ڈالر زیادہ ہیں۔

پنجاب کے ضلع ٹوبہ ٹیک سنگھ میں ذرائع ابلاغ سے گفتگو کرتے ہوئے وفاقی وزیر نے بتایا کہ برآمدات میں یہ نمایاں اضافہ ملکی تجارتی سرگرمیوں کے لیے انتہائی حوصلہ افزا ہے۔ انہوں نے تفصیلات بتاتے ہوئے کہا کہ رواں مالی سال کی پہلی سہ ماہی کے دوران سی فوڈ کی برآمدات میں گزشتہ سہ ماہی کے مقابلے میں 74 فیصد کا بڑا اضافہ ریکارڈ کیا گیا ہے۔

جنید انوار چودھری نے مزید کہا کہ حکومت ملکی برآمدات اور برآمد کنندگان کی سہولت کے لیے ہنگامی بنیادوں پر نئے سمندری راستے کھول رہی ہے۔ انہوں نے اعلان کیا کہ یورپ جانے والے ٹیکسٹائل و گارمنٹس برآمد کنندگان کے لیے براہِ راست شپنگ سروس کا انتظام کیا جا رہا ہے، جس سے یورپی منڈیوں تک مال کی بروقت ترسیل ممکن ہوگی اور بحری مال برداری کے اخراجات میں بھی واضح کمی آئے گی۔