ای سی او وزرائے کونسل اجلاس، اسحاق ڈار کی بروقت انتظامات یقینی بنانے کی ہدایت

نائب وزیراعظم و وزیرِ خارجہ اسحاق ڈار کی زیرِ صدارت اقتصادی تعاون تنظیم (ECO) کے وزرائے کونسل کے 28ویں اجلاس کی تیاریوں کا جائزہ لینے کے لیے ایک اعلیٰ سطحی اجلاس منعقد ہوا۔

ترجمان دفترِ خارجہ کے مطابق ای سی او وزرائے کونسل کا دو روزہ اہم اجلاس 15 اور 16 نومبر کو اسلام آباد میں منعقد ہوگا، جس کے لیے نائب وزیراعظم نے مجوزہ پروگرامز، سفارتی انتظامات اور سیکورٹی فراہم کرنے والے اداروں کی تیاریوں کا تفصیلی جائزہ لیا۔

اجلاس کے دوران گفتگو کرتے ہوئے نائب وزیراعظم اسحاق ڈار نے اقتصادی تعاون تنظیم میں پاکستان کے کلیدی کردار اور خطے کی معاشی ترقی کے لیے اس کی اہمیت کو اجاگر کیا۔ انہوں نے تمام متعلقہ اداروں اور وزارتی کمیٹیوں کو ہدایت کی کہ اجلاس کے باوقار اور کامیاب انعقاد کو یقینی بنانے کے لیے تمام تر تیاریاں بروقت مکمل کی جائیں اور باہمی رابطہ برقرار رکھا جائے۔