27ویں ترمیم آئین پر حملہ،یہ 9/11 کی طرح ہے،ایسے دستور کو ہم نہیں مانتے،محمود اچکزئی

آئین تحفظ پاکستان کے چئیرمین محمود خان اچکزئی نے پریس کانفرنس میں کہا ہے کہ چھٹی کے دن آئین اور ملک کی بنیادوں پر حملہ کیا گیا ہے، جسے انہوں نے 9/11 سے تشبیہ دی۔ انہوں نے حکومت و پارلیمانی عمل پر شدید تنقید کرتے ہوئے ملک بھر میں احتجاجی تحریک شروع کرنے کا اعلان کیا۔

اچکزئی نے کہا کہ فرد واحد کی مضبوطی پاکستان کو نہیں بچائے گی اور اس حملے کو ملک کی بنیادوں پر حملہ قرار دیتے ہوئے سب کو خبردار کیا کہ اس سے پارلیمنٹ اور آئینی عمل متاثر ہوگا۔ انہوں نے سوال اٹھایا کہ جب اسکول کے بچے اپنے حقوق کے لیے باہر آئیں گے تو گولیاں کیوں چلائی جائیں گی۔
انہوں نے کہا کہ آج رات ساڑھے آٹھ بجے سے نعرے شروع کئے جائیں گے اور آج کا نعرہ ہوگا،ایسے دستور کو ہم نہیں مانتے۔ اچکزئی نے مزید کہاآج سے تحریک تحفظِ پاکستان کا احتجاج شروع کیا جا رہا ہے۔
محمود اچکزئی نے کہا کہ ان کی کسی ذاتی دشمنی کا مسئلہ نہیں، یہ ملک کے آئینی تحفظ اور بنیادوں کی بات ہے۔ انہوں نے دعویٰ کیا کہ پاکستان پر بغیر انتخاب کے ایک بد بخت ٹولہ قابض ہو چکا ہے، جبکہ خود وہ اور ان کے ساتھی اس ملک سے محبت کرنے والے ہیں۔ انہوں نے کہا کہ انہیں ملکی آئین کے دفاع کا متعدد مرتبہ حلف دلایا گیا اور عوام میں جاری جھوٹے پروپیگنڈےغلط تاثر پیدا کر رہے ہیں۔