18ویں آئینی ترمیم میں مشاورت کے بغیر کوئی تبدیلی نہیں ہوگی،وزیراعظم شہبازشریف

وزیراعظم شہبازشریف نے کہاکالاباغ ڈیم ایک شاندار اقتصادی منصوبہ ہے اور وفاق کو اگر اس سے نقصان پہنچتا ہے تو ہمیں بھی قبول نہیں۔

18ویں آئینی ترمیم میں مشاورت کے بغیر کوئی تبدیلی نہیں ہوگی۔وزیراعظم شہباز شریف نے قومی اسمبلی میں خطاب کرتے ہوئے کہا کہ اس ایوان نے آج قومی اتحاد اور یکجہتی کا اظہار کیا۔ انہوں نے تمام ارکان کا شکریہ ادا کیا اور آئینی ترمیم پر اتفاق رائے کو سراہا۔

وزیراعظم نے عدلیہ اور قانون کی بالادستی پر بھی زور دیا اور کہا کہ امید ہے کہ چیف جسٹس یحییٰ آفریدی سے رہنمائی ملتی رہے گی۔چیف جسٹس سپریم کورٹ جوڈیشل کمیشن، لا اینڈ جسٹس کمیشن کی سربراہی بدستور کریں گے۔

وزیراعظم نے کہا کہ دہشتگردی کے خلاف جنگ میں سب سے زیادہ قربانیاں ہماری فورسز دے رہی ہیں اور قومی معاملات پر چاروں اکائیوں کا اتفاق ضروری ہے۔ انہوں نے مزید کہا کہ اتحادیوں کے ساتھ بیٹھ کر تمام معاملات طے کیے جائیں گے۔وزیراعظم نے کہا کہ کل وانا میں دہشتگردوں نے مذموم اور گھٹیا حرکت کی، اور دہشتگردوں میں افغانستان کے لوگ بھی شامل تھے۔ انہوں نے واضح کیا کہ تمام دہشتگردوں کو جہنم واصل کیا گیا اور کامیاب آپریشن پر پاک فوج کو خراج تحسین پیش کیا۔

انہوں نے سانحہ اے پی ایس کی یاد تازہ ہونے کا ذکر کرتے ہوئے کہا کہ اسلام آباد میں دہشتگردی کے واقعے میں 12 پاکستانی شہید ہوئے اور ان میں خارجی ہاتھ نمایاں ہے۔ وزیراعظم نے کہا کہ بی ایل اے اور ٹی ٹی پی کے بھارت سے روابط ہیں اور بھارت کو پہلے بھی جواب دیا گیا، اب بھی دیا جائے گا۔شہباز شریف نے افغانستان کے عبوری حکومت سے بھی کہا کہ دہشتگردوں کے خلاف کارروائی کی جائے تاکہ افغانستان پاکستان کے ساتھ امن میں شریک ہو۔ انہوں نے کہا کہ ایسا نہیں ہو سکتا کہ افغانستان جھوٹے یا سچے وعدے کرے۔