پاک۔امریکہ کا پرامن اور مستحکم افغانستان کے قیام پر مشترکہ عزم

وزیرِ دفاع خواجہ آصف اور امریکی ناظم الامور نیٹلی بیکر کے درمیان وزارتِ دفاع میں ملاقات ہوئی، جس میں دوطرفہ دفاعی تعاون، علاقائی امن اور باہمی دلچسپی کے امور پر تفصیلی تبادلۂ خیال کیا گیا۔ ملاقات میں پاکستان اور امریکہ نے اس عزم کا اعادہ کیا کہ پرامن، مستحکم اور محفوظ افغانستان خطے کے امن و استحکام کے لیے نہایت اہم ہے۔ دونوں ممالک نے اس امر پر اتفاق کیا کہ مشترکہ چیلنجز سے مؤثر انداز میں نمٹا جائے گا اور تعاون کو مزید فروغ دیا جائے گا۔وزیرِ دفاع خواجہ آصف نے کہا کہ پاک۔امریکہ تعلقات باہمی احترام، استحکام اور خوشحالی کے مشترکہ مقاصد پر مبنی ہیں۔ انہوں نے اس بات پر زور دیا کہ دونوں ممالک کے درمیان تعاون نہ صرف علاقائی بلکہ عالمی امن کے فروغ میں بھی کلیدی کردار ادا کر سکتا ہے۔ملاقات میں دوطرفہ تعلقات میں مثبت پیش رفت پر اطمینان کا اظہار کیا گیا،جبکہ دفاعی تعاون سمیت مختلف شعبوں میں تعلقات کو مزید وسعت دینے پر بھی اتفاق کیا گیا۔