صدرِ مملکت نے سینیٹ اجلاس طلب کرلیا، 18 نکاتی ایجنڈا جاری

صدرِ مملکت آصف علی زرداری نے سینیٹ کا اجلاس کل شام 5 بجے طلب کرلیا ہے جس کا باضابطہ نوٹیفکیشن سینیٹ سیکرٹریٹ کی جانب سے جاری کیا گیا۔ اجلاس کے ساتھ ہی 18 نکاتی ایجنڈا بھی جاری کردیا گیا ہے جس میں اہم قانون سازی، مختلف وزارتوں سے متعلق سوالات اور کئی کمیٹی رپورٹس کی پیشکش شامل ہے۔

ایجنڈے کے مطابق اجلاس میں سینیٹر شیری رحمٰن ماحولیاتی تبدیلی سے متعلق کمیٹی کی دو رپورٹس پیش کریں گی جبکہ سینیٹر عرفان صدیقی خارجہ امور کمیٹی کی رپورٹ ایوان میں رکھیں گے۔ یوٹیلٹی اسٹورز کارپوریشن کی ممکنہ بندش پر سینیٹر عون عباس اپنی رپورٹ پیش کریں گے۔ اسی دوران سینیٹر رانا محمود الحسن نیشنل اسکول آف پبلک پالیسی ایکٹ میں ترمیم کا بل ایوان میں لائیں گے، جبکہ وزیرِ قانون اعظم نذیر تارڑ قانونِ شہادت (ترمیمی) بل 2025 پیش کریں گے۔

اجلاس میں وزیرِ خزانہ محمد اورنگزیب ورچوئل ایسٹس آرڈیننس میں 120 روز کی توسیع کی قرارداد پیش کریں گے، اور وزیرِ داخلہ محسن نقوی فرنٹیر کانسٹیبلری (تنظیمِ نو) آرڈیننس 2025 ایوان میں رکھیں گے۔ اس کے علاوہ وزیرِ تعلیم خالد مقبول صدیقی کنگ حمد یونیورسٹی نرسنگ بل اور دانش اسکول اتھارٹی بل پیش کریں گے جبکہ وزیرِ سرمایہ کاری قیصر احمد شیخ آسان کاروبار بل 2025 سینیٹ میں لائیں گے۔

سینیٹ کا یہ اجلاس نہ صرف قانون سازی کے اہم مرحلے کے لیے اہم سمجھا جا رہا ہے بلکہ مختلف قومی اداروں، پالیسی اصلاحات اور حکومتی اقدامات پر تفصیلی بحث کی بھی توقع ہے۔