صدر آصف زرداری اور خالد مقبول صدیقی کی ملاقات، پیپلز پارٹی اور ایم کیو ایم تعلقات پر تبادلہ خیال

کراچی میں صدر مملکت آصف علی زرداری سے متحدہ قومی موومنٹ پاکستان کے رہنما اور وفاقی وزیر خالد مقبول صدیقی نے ملاقات کی جس میں سیاسی امور اور حکومتی معاملات پر گفتگو کی گئی۔

ذرائع کے مطابق ملاقات میں وفاقی وزیر داخلہ محسن نقوی، وزیر اعلیٰ سندھ اور وزیر داخلہ سندھ ضیاء الحسن لنجار سمیت دیگر شخصیات بھی موجود تھیں۔

ذرائع کا کہنا ہے کہ اجلاس کے دوران پاکستان پیپلز پارٹی اور متحدہ قومی موومنٹ پاکستان کے درمیان تعلقات اور باہمی تعاون کے امور پر تبادلہ خیال کیا گیا۔

اس موقع پر سندھ کی سیاسی صورتحال اور حکومت سے متعلق مختلف معاملات پر بھی گفتگو ہوئی۔

واضح رہے کہ متحدہ قومی موومنٹ پاکستان نے حال ہی میں وفاقی حکومت کی جانب سے گورنر سندھ کی تبدیلی پر اعتراض اٹھایا تھا۔

ایم کیو ایم پاکستان کا مؤقف تھا کہ گورنر سندھ کی تبدیلی کے معاملے پر انہیں اعتماد میں نہیں لیا گیا۔