چین سے پارلیمانی تعاون، ادارہ جاتی روابط، تجربات کے تبادلے فروغ پا رہے: یوسف رضا گیلانی

چیئرمین سینیٹ سید یوسف رضا گیلانی نے کہا ہے کہ پاکستان اور چین کے مابین پارلیمانی تعاون، مضبوط ادارہ جاتی روابط اور تجربات کا باہمی تبادلہ وقت کے ساتھ ساتھ مزید فروغ پا رہا ہے، جو دونوں ممالک کے دیرینہ تعلقات کا عکاس ہے۔

اسلام آباد میں ’پاک چین ریسرچ سینٹر فار پارٹی اینڈ اسٹیٹ گورننس‘ کی باضابطہ افتتاحی تقریب سے بطورِ مہمانِ خصوصی خطاب کرتے ہوئے چیئرمین سینیٹ سید یوسف رضا گیلانی کا کہنا تھا کہ چین کا جدید طرزِ حکمرانی، شاندار ادارہ جاتی ترقی اور منفرد معاشی تجربات پاکستان کے لیے نہایت قابلِ قدر رہنمائی فراہم کر سکتے ہیں۔ انہوں نے زور دیا کہ پارلیمانی اور ادارہ جاتی سطح پر قریبی تعاون پاک چین لازوال دوستی کو مزید مستحکم اور پائیدار بنانے کے لیے انتہائی ناگزیر ہے۔ ان کا کہنا تھا کہ غربت کے مکمل خاتمے، دیہی علاقوں کی ترقی، ڈیجیٹل گورننس اور جدید صنعتی ترقی کے میدان میں چین کی غیر معمولی پیش رفت پوری دنیا بالخصوص ترقی پذیر ممالک کے لیے قابلِ تحسین ہے۔

سید یوسف رضا گیلانی نے اس بات پر روشنی ڈ الی کہ پاک چین اسٹریٹجک اور اقتصادی شراکت داری کے اگلے مرحلے میں سرمایہ کاری کے فروغ، روزگار کے نئے مواقع کی فراہمی اور نوجوانوں کی ہنرمندی کو اولین ترجیح دی جانی چاہیے۔ انہوں نے مزید کہا کہ پاک چین اقتصادی راہداری (سی پیک 2.0) زراعت کے شعبے، جدید صنعتی ترقی، انفارمیشن ٹیکنالوجی (آئی ٹی) اور علاقائی روابط کے فروغ کے لیے وسیع تر اور سنہری مواقع فراہم کر رہا ہے، جن سے بھرپور فائدہ اٹھایا جائے گا۔