سعودیہ کی حمایت کی تو امریکا بھی ہمارے نشانے پر ہوگا: حوثیوں کی دھمکی

یمن کے حوثی جنگجوؤں نے امریکہ کو سخت خبردار کرتے ہوئے کہا ہے کہ اگر امریکی افواج نے سعودی عرب کی حمایت میں یمن کی جنگ میں براہِ راست فوجی مداخلت کی یا آبنائے باب المندب کا کنٹرول سنبھالنے کی کوشش کی تو خطے میں موجود تمام امریکی مفادات، فوجی تنصیبات اور بحری جہازوں کو نشانہ بنایا جائے گا۔

حوثی عسکری مشیر عابد محمد الثور نے فرانسیسی خبر رساں ادارے (AFP) سے گفتگو کرتے ہوئے واضح کیا کہ اگر امریکہ اپنے بحری بیڑے کے ذریعے یمن میں فوجی مداخلت کرتا ہے تو یہ حوثیوں کے لیے ایک ‘سرخ لکیر’ ہوگی۔ انہوں نے کہا کہ واشنگٹن کی جانب سے ریاض کی حمایت میں فضائی حملوں یا کسی بھی قسم کی فضائی معاونت کی صورت میں خطے میں امریکی مفادات کو موثر اہداف تصور کیا جائے گا اور حوثی آبنائے باب المندب کو امریکی بحری جہازوں کے لیے مکمل طور پر بند کرنے پر سنجیدگی سے غور کریں گے۔

یہ شدید دھمکی ایسے وقت میں سامنے آئی ہے جب امریکی میڈیا رپورٹس کے مطابق سعودی عرب کی جانب سے حوثیوں کے خلاف فضائی و عسکری معاونت کا تقاضا کیا گیا ہے اور امریکی صدر ڈونلڈ ٹرمپ ممکنہ عسکری کارروائیوں پر غور کر رہے ہیں۔ بحیرۂ احمر اور خلیج عدن کو ملانے والی عالمی تجارتی شاہراہ ‘آبنائے باب المندب’ کی سیکیورٹی پر تشویش کا اظہار کرتے ہوئے حال ہی میں روسی صدر ولادیمیر پوتن اور سعودی ولی عہد محمد بن سلمان نے بھی اس بحری گزرگاہ سے بلا رکاوٹ تجارتی نقل و حمل کی اہمیت پر زور دیا ہے۔