‘امریکا اور ایران اسلام آباد مفاہمتی یادداشت کی طرف واپس آئیں’ ، چینی صدر شی جن پنگ کا صدر ٹرمپ سے مطالبہ

چین کے صدر شی جن پنگ نے اپنے دورۂ امریکہ کے دوران وائٹ ہاؤس میں امریکی صدر ڈونلڈ ٹرمپ سے اہم ملاقات کی، جہاں صدر ٹرمپ اور امریکی خاتونِ اول نے ان کا شاندار استقبال کیا۔ اس سے قبل امریکی صدر نے روایتی پروٹوکول سے ہٹ کر خود ایئرپورٹ جا کر چینی صدر کا خیرمقدم کیا، جہاں انہیں 100 فٹ طویل ریڈ کارپٹ، 21 توپوں کی سلامی اور فوجی طیاروں کے فلائی پاسٹ کے ساتھ پرتشاکل استقبالیہ دیا گیا۔ ملاقات میں دوطرفہ تجارتی، سیکیورٹی اور آرٹیفیشل انٹیلی جنس (AI) جیسے اہم امور پر تبادلہ خیال کیا گیا۔

چینی سرکاری خبر رساں ایجنسی ‘شینہوا’ کے مطابق، صدر شی جن پنگ نے صدر ٹرمپ پر زور دیا کہ امریکہ اور ایران مشرقِ وسطیٰ کے تنازعات کے پائیدار حل کے لیے دوبارہ مذاکرات کی میز پر آئیں اور ‘اسلام آباد مفاہمت کی یادداشت’ پر عمل درآمد کی طرف لوٹیں۔ انہوں نے امید ظاہر کی کہ دونوں ممالک ایک ایسے جامع معاہدے پر متفق ہوں گے جس میں ایٹمی معاملے سمیت تمام تنازعات کا حل شامل ہو۔ اس موقع پر صدر ڈونلڈ ٹرمپ نے چینی صدر کے ساتھ دوستانہ تعلقات کا اعتراف کرتے ہوئے کہا کہ دونوں ممالک باہمی احترام اور عوامی مفادات کی بنیاد پر معاشی و تجارتی تعلقات کو متوازن بنانے اور عالمی امن کے لیے یکجا کام کرتے رہیں گے۔