دبئی میں عالمی پولیس سربراہی اجلاس 2026 کی تیاریاں آخری مراحل میں داخل

متحدہ عرب امارات میں عالمی پولیس سربراہی اجلاس (ورلڈ پولیس سمٹ) 2026ء کی تیاریاں آخری مراحل میں داخل ہو گئی ہیں۔ دبئی پولیس کی میزبانی میں اس عالمی سمٹ کا پانچواں ایڈیشن 16 سے 18 نومبر تک دبئی ورلڈ ٹریڈ سینٹر میں منعقد ہوگا، جس میں 90 سے زائد ممالک کے وفود اور پولیس و سکیورٹی سمیت مختلف شعبوں کے 220 سے زائد عالمی رہنماؤں کی شرکت متوقع ہے۔

یہ تین روزہ عالمی اجلاس متحدہ عرب امارات کے نائب صدر، وزیراعظم اور دبئی کے حکمران شیخ محمد بن راشد آل مکتوم کی سرپرستی میں دبئی پولیس اور ‘ڈی ایکس بی لائیو’ کے باہمی اشتراک سے منعقد کیا جا رہا ہے۔ رواں سال کانفرنس کا مرکزی موضوع عالمی پولیس اداروں کے درمیان مؤثر روابط قائم کر کے آنے والی نسلوں کے لیے ایک محفوظ مستقبل کی تشکیل ہے۔ اجلاس میں مختلف ممالک کے وزرائے داخلہ، پولیس سربراہان، بین الاقوامی تنظیموں کے نمائندے، سکیورٹی ماہرین، ٹیکنالوجی کمپنیوں اور تعلیمی اداروں سے وابستہ ممتاز شخصیات شرکت کریں گی، جن میں انٹرپول اور آسٹریلین فیڈرل پولیس کے اعلیٰ عہدیدار بھی شامل ہیں۔

کانفرنس کے دوران 15 اہم موضوعاتی شعبوں کے تحت جدید پولیسنگ، مصنوعی ذہانت (AI)، سائبر کرائم، منی لانڈرنگ، منظم جرائم، منشیات کی اسمگلنگ اور سرحد پار جرائم سے نمٹنے کے لیے مشترکہ حکمت عملی پر تفصیلی تبادلہ خیال کیا جائے گا۔ اجلاس کے موقع پر ایک بین الاقوامی نمائش بھی سجائی جائے گی، جس میں 150 سے زائد نمائش کنندگان جدید سکیورٹی ٹیکنالوجی، مصنوعی ذہانت پر مبنی نظام، نگرانی کے جدید آلات اور ڈیجیٹل تحقیقات کے حل پیش کریں گے۔ مزید برآں، اس سال پہلی مرتبہ بین الاقوامی تنظیموں کے لیے ایک خصوصی پویلین بھی قائم کیا جا رہا ہے جس میں خلیجی پولیس تعاون کی تنظیم، آسیان پولیس (ASEANAPOL) اور اقوامِ متحدہ کے دفتر برائے منشیات و جرائم (UNODC) سمیت دیگر علاقائی و عالمی ادارے شریک ہوں گے تاکہ معلومات اور ٹیکنالوجی کے تبادلے کو فروغ دیا جا سکے۔