ایران کی ناکہ بندی برقرار، تجارتی جہازوں کیلئے راستہ کھلا رکھنے کی کوششیں جاری ہیں: سینٹ کام

امریکی سینٹرل کمانڈ (سینٹ کام) نے کہا ہے کہ ایران کی بحری ناکہ بندی کو انتہائی سختی سے برقرار رکھا جا رہا ہے، جبکہ بین الاقوامی تجارتی جہازوں کی آمدورفت کے لیے آبنائے ہرمز کو کھلا اور محفوظ رکھنے کی کوششیں بھرپور انداز میں جاری ہیں۔

امریکی سینٹ کام کی جانب سے جاری کردہ بیان کے مطابق آبنائے ہرمز کے مرکزی بحری راستے مکمل طور پر بارودی سرنگوں سے پاک ہیں اور امریکی افواج دن رات تجارتی جہاز رانی کی مکمل بحالی اور حساس بحری راستوں کی کڑی نگرانی کے لیے سرگرم ہیں۔ بیان میں مزید کہا گیا ہے کہ ایران کو زمینی اور سمندری راستوں کے ذریعے جدید ہتھیاروں کی منتقلی سے روکنے کے لیے مؤثر اور ٹھوس اقدامات کیے جا رہے ہیں۔

سینٹ کام کے حکام نے واضح کیا کہ امریکی ادارے باہمی اشتراک سے ایرانی پاسدارانِ انقلاب کو زمینی گزرگاہوں اور بحیرہ کیسپین کے راستے جدید ہتھیاروں، دوہرے استعمال کی ٹیکنالوجی، عالمی پابندیوں کی زد میں آنے والے مواد اور غیر قانونی مالی وسائل کی ترسیل روکنے کے لیے مسلسل مصروفِ عمل ہیں۔ امریکی سینٹرل کمانڈ نے اس عزم کا اعادہ کیا کہ آبنائے ہرمز میں عالمی تجارتی جہازوں کی محفوظ آمدورفت کو یقینی بنانا ان کی اولین ترجیحات میں شامل ہے۔