سندھ کی تقسیم قانونی اور شعوری طور پر ممکن نہیں، وزیراعلیٰ مراد علی شاہ

پاکستان پیپلز پارٹی کے سینئر رہنما اور وزیراعلیٰ سندھ سید مراد علی شاہ نے دوٹوک الفاظ میں واضح کیا ہے کہ سندھ کی تقسیم نہ تو آئینی و قانونی طور پر ممکن ہے اور نہ ہی شعوری طور پر اس کی کوئی گنجائش موجود ہے۔

ٹھٹہ میں میڈیا نمائندوں سے گفتگو کرتے ہوئے وزیراعلیٰ سندھ مراد علی شاہ کا کہنا تھا کہ اگر کوئی دوسرا صوبہ اپنے ہاں نئے صوبے بنانا چاہتا ہے تو ہمیں اس پر کوئی اعتراض نہیں؛ پنجاب اگر نئے صوبے تشکیل دینا چاہتا ہے تو ضرور بنا سکتا ہے۔ انہوں نے آئینی نکات واضح کرتے ہوئے کہا کہ آئینِ پاکستان کے تحت متعلقہ صوبے کے عوام کی خواہش اور منشا کے بغیر کسی بھی صوبے کی جغرافیائی حدود میں تبدیلی ممکن نہیں، اور اگرچہ آئین میں ریفرنڈم کا طریقہ کار موجود ہے تاہم ریفرنڈم صرف ایسے معاملے پر کرایا جا سکتا ہے جس میں کوئی ابہام پایا جاتا ہو، جبکہ سندھ کے عوام کا مؤقف بالکل واضح ہے۔

پانی کے مسئلے پر بات کرتے ہوئے مراد علی شاہ نے کہا کہ صوبوں کے درمیان پانی کی منصفانہ تقسیم 1991ء کے آبی معاہدے کے مطابق یقینی بنانے کے لیے سندھ کا مقدمہ پہلے ہی مشترکہ مفادات کونسل (سی سی آئی) میں موجود ہے۔ انہوں نے پانی چوری کے الزامات کو مسترد کرتے ہوئے سوال اٹھایا کہ جب سندھ تک اس کے حصے کا پانی پہنچے گا ہی نہیں تو چوری کہاں سے ہوگی؟ وزیراعلیٰ نے مزید کہا کہ سندھ اس وقت بھی پانی کی شدید قلت کا شکار ہے اور یہ سنگین معاملہ وفاقی حکومت کے سامنے بھرپور انداز میں اٹھایا جا چکا ہے۔