سردیوں میں شمالی علاقوں کے سفر سے قبل احتیاطی تدابیر اختیار کریں، موٹروے پولیس

موٹروے پولیس کے ترجمان نے سردیوں کے موسم میں شمالی اور پہاڑی علاقوں کا سفر کرنے والے شہریوں کے لیے حفاظتی ہدایات جاری کر دی ہیں۔

ترجمان کے مطابق مسافر سفر سے قبل موسم کی تازہ ترین صورتحال اور سڑکوں کی حالت سے ضرور آگاہی حاصل کریں۔
انہوں نے ہدایت کی کہ گاڑی کے ٹائر، بریک، ہیٹر اور وائپرز مکمل طور پر درست حالت میں ہونے چاہئیں۔

موٹروے پولیس کا کہنا ہے کہ برفباری کی صورت میں ٹائر چین ضرور ساتھ رکھیں اور ضرورت کے وقت ان کا درست استعمال کریں۔
دورانِ سفر رفتار کم رکھیں اور اچانک بریک لگانے سے گریز کریں تاکہ پھسلن کے باعث حادثات سے بچا جا سکے۔

ترجمان کے مطابق گاڑی میں اضافی گرم کپڑے، کمبل اور دستانے ضرور موجود ہونے چاہئیں، جبکہ موبائل فون مکمل چارج رکھیں اور پاور بینک ساتھ رکھنا بہتر ہے۔

موٹروے پولیس نے مسافروں کو ہدایت کی ہے کہ ایندھن کی ٹینکی آدھی سے کم نہ ہونے دیں، خاص طور پر طویل اور پہاڑی راستوں پر۔
پہاڑی سڑکوں پر اوورٹیکنگ سے حتی الامکان پرہیز کریں اور رات کے وقت یا شدید برفباری میں غیر ضروری سفر سے گریز کریں۔

کسی بھی ہنگامی صورتحال میں شہری موٹروے پولیس کی ہیلپ لائن 130 پر فوری رابطہ کر سکتے ہیں۔