آرٹیکل 243 میں ترمیم کی حمایت کریں گے، بلاول بھٹو زرداری

چیئرمین پیپلزپارٹی بلاول بھٹو زرداری نے کہا ہے کہ آرٹیکل 243 میں مجوزہ ترمیم کی حمایت کریں گے، تاہم دہری شہریت اور الیکشن کمشنر سے متعلق نکات پر پیپلزپارٹی کی حمایت حاصل نہیں ہوگی۔
اسلام آباد میں میڈیا سے گفتگو کرتے ہوئے بلاول بھٹو زرداری نے کہا کہ آئینی عدالتوں کے قیام کی حمایت کرتے ہیں، لیکن میثاقِ جمہوریت کے دیگر نکات پر بھی عمل کیا جانا چاہیے۔ان کا کہنا تھا کہ آئین کے مطابق ججز کے تبادلے صدرِ مملکت، چیف جسٹس کے مشورے سے کرتے ہیں، تاہم مجوزہ ترمیم کے بعد یہ اختیار پارلیمانی کمیٹی کو دیا جا رہا ہے۔ پیپلزپارٹی کی تجویز ہے کہ جس عدالت سے جج کا تبادلہ ہو، اس کے چیف جسٹس اور جس عدالت میں بھیجا جائے، اس کے چیف جسٹس دونوں کو کمیشن میں شامل کیا جائے تاکہ شفافیت برقرار رہے۔چیئرمین پیپلزپارٹی نے کہا کہ ججز کے تبادلے کے معاملے پر حکومت سے رابطے میں ہیں، جوڈیشل کمیشن کے فورم سے ججز کے تبادلے ہونے چاہییںانہوں نے کہا کہ دہری شہریت سے متعلق ترمیم کی حمایت نہیں کریں گے، جبکہ این ایف سی ایوارڈ کے تحت صوبوں کے حصے پر کوئی سمجھوتہ نہیں کیا جائے گا۔بلاول بھٹو زرداری کا کہنا تھا کہ مسلم لیگ (ن) نے بلدیاتی نظام سے متعلق کسی ترمیم کی بات نہیں کی، سب سے مضبوط اور خودمختار بلدیاتی نظام اس وقت صوبہ سندھ میں موجود ہے، جسے آئینی تحفظ پیپلزپارٹی نے ہی دیا۔
ان کا مزید کہنا تھا کہ صدرِ پاکستان کے اختیارات کسی بھی طرح متاثر نہیں ہو رہے، اور حکومت سے مشاورت کے بعد دیگر نکات پر بھی بات چیت جاری رہے گی