صوبے کا مقدمہ دلیل سے لڑیں گے، وفاق سے حق لے کر رہیں گے: فیصل کریم کنڈی

گورنر خیبرپختونخوا فیصل کریم کنڈی نے کہا ہے کہ وفاق کے ساتھ بات دلیل اور دلائل کی بنیاد پر کی جائے گی اور صوبے کے حقوق لے کر رہیں گے۔ انہوں نے کہا کہ وہ صوبے کا مقدمہ لڑنے کے لیے وزیراعلیٰ کے شانہ بشانہ بلکہ ان سے دو قدم آگے کھڑے ہوں گے۔

میڈیا سے گفتگو کرتے ہوئے فیصل کریم کنڈی نے کہا کہ ماضی میں پی ٹی آئی کی جانب سے سخت بیانات دیے گئے، تاہم آج صورتحال بدل چکی ہے اور وفاق نے مذاکرات کے لیے بڑا پن دکھاتے ہوئے پی ٹی آئی کی دعوت قبول کی ہے۔

امن و امان کے حوالے سے گورنر نے کہا کہ اصل مسئلہ کرم ایجنسی میں ہے جہاں صورتحال تشویشناک ہے۔ انہوں نے کہا کہ دہشتگردی کے خلاف فوج کے شانہ بشانہ کھڑے ہیں کیونکہ امن سے ہی خوشحالی اور ترقی ممکن ہے۔ بھتہ خوری اور غیر قانونی سرگرمیوں کے خلاف زیرو ٹالرنس کی پالیسی پر عمل کیا جائے گا اور صوبائی حکومتوں کو اداروں کی مکمل حمایت کرنی چاہیے۔

افغان مہاجرین سے متعلق انہوں نے کہا کہ افغان باشندے اپنے وطن واپس جائیں اور قانونی طریقے سے ویزا لے کر پاکستان آئیں۔ انہوں نے الزام لگایا کہ افغانستان کی سرزمین بھارت کی جانب سے دہشتگردی کے لیے استعمال ہو رہی ہے۔

فیصل کریم کنڈی نے مزید کہا کہ جب پاکستان بھارت کو چار دن میں مؤثر جواب دے سکتا ہے تو مٹھی بھر شرپسند عناصر سے نمٹنا بھی ممکن ہے۔