فرانس کے جنگلات میں آتشزدگی، ڈیڑھ لاکھ افراد نقل مکانی پر مجبور

یورپ میں شدید ہیٹ ویو کے باعث فرانس اور اسپین کے جنگلات میں تباہ کن آگ بھڑک اٹھی ہے، جس نے وسیع رقبے کو اپنی لپیٹ میں لے لیا ہے۔ فرانس کے جنوب مغربی جنگلات میں لگنے والی آگ کی شدت کے باعث ڈیڑھ لاکھ سے زائد افراد اپنے گھر بار چھوڑ کر محفوظ مقامات پر منتقل ہونے پر مجبور ہو گئے ہیں، جبکہ اسپین نے صورتحال کی سنگینی کو دیکھتے ہوئے ملک گیر ہنگامی حالت نافذ کر دی ہے۔

غیر ملکی خبر ایجنسی کے مطابق فرانسیسی حکام نے مشہور سیاحتی علاقے ‘کیپ فیرے’ سے تمام مقامی شہریوں اور سیاحوں کو فوری اور مکمل انخلا کی ہدایت جاری کی ہے۔ فرانس کے صدر امینوئل میکرون نے آگ پر قابو پانے کے لیے فوج کو فوری طور پر شہری انتظامیہ اور فائر فائٹرز کی مدد کا حکم دے دیا ہے۔

دوسری جانب، اسپین کے دارالحکومت میڈرڈ کے نواحی جنگلات میں پھیلنے والی آگ کے باعث ملک کی تاریخ میں پہلی بار قومی ہنگامی حالت (National Emergency) نافذ کی گئی ہے۔ اسپین میں اب تک ۱۹ ہزار افراد کو متاثرہ علاقوں سے نکالنے کا حکم دیا جا چکا ہے، جبکہ فائر فائٹنگ آپریشن میں ۲ ہزار فوجی اہلکار اور ۱۰ ہوائی جہاز آگ بجھانے کی کوششوں میں مصروف ہیں۔