وائٹ ہاؤس نے ’ٹرمپ ٹی وی‘ کے نام سے 24 گھنٹے چلنے والا چینل لانچ کر دیا

وائٹ ہاؤس نے ‘ٹرمپ ٹی وی’ (Trump TV) کے نام سے 24 گھنٹے چلنے والا ایک نیا چینل باضابطہ طور پر لانچ کر دیا ہے، جس پر امریکی صدر ڈونلڈ ٹرمپ کی تمام تقاریر، اہم بیانات، پریس کانفرنسز اور انتظامیہ کی کارکردگی پر مبنی نمایاں ویڈیوز براہِ راست نشر کی جائیں گی۔ وائٹ ہاؤس کے حکام کے مطابق یہ چینل رئیل ٹائم میں اپ ڈیٹ ہوتا رہے گا اور اس کی تمام نشریات وائٹ ہاؤس کی سرکاری ویب سائٹ پر دنیا بھر کے صارفین کے لیے 24 گھنٹے دستیاب ہوں گی۔

ٹرمپ انتظامیہ کا یہ غیر معمولی اقدام ایک ایسے وقت میں سامنے آیا ہے جب امریکی صدر نے گزشتہ دنوں سی این این (CNN) سمیت امریکا کے 3 بڑے اور معروف میڈیا اداروں کے نمائندوں کے وائٹ ہاؤس میں داخلے پر پابندی عائد کر دی تھی۔ امریکی صدر کی جانب سے صحافیوں اور مرکزی میڈیا پر لگائی جانے والی اس پابندی کے ردِعمل میں امریکا بھر کے تمام بڑے ٹی وی نیٹ ورکس نے بھی احتجاجاً صدر ڈونلڈ ٹرمپ اور ان کی سرگرمیوں کی کوریج پر مکمل پابندی کا فیصلہ کیا ہے۔