روس میں واٹس ایپ باضابطہ طور پر بلاک، 10 کروڑ سے زائد صارفین متاثر

 روس نے میٹا کی زیرملکیت میسجنگ ایپ واٹس ایپ کو اپنے ملک میں باضابطہ طور پر بلاک کر دیا ہے۔ اس پابندی سے روس میں واٹس ایپ استعمال کرنے والے 10 کروڑ سے زائد افراد متاثر ہوئے ہیں۔

رپورٹس کے مطابق روسی انتظامیہ نے واٹس ایپ کو آن لائن ڈائریکٹری سے ہٹا کر مؤثر انداز میں روسی انٹرنیٹ سے خارج کر دیا ہے۔ حکومتی کوششوں کا مقصد صارفین کو مقامی میسجنگ ایپ “میکس” پر منتقل کرنا ہے، جو وی چیٹ کی طرح کام کرتی ہے لیکن اس میں اینڈ ٹو اینڈ انکرپشن کی سہولت موجود نہیں۔

میٹا نے بیان میں کہا کہ روسی حکومت نے واٹس ایپ کو مکمل طور پر بلاک کرنے کی کوشش کی تاکہ صارفین کو نگرانی میں کام کرنے والی ایپ پر منتقل کیا جا سکے، جس سے عوام کو محفوظ کمیونیکیشن کا حق محدود ہو جائے گا۔

واضح رہے کہ روس نے 11 فروری کو ٹیلیگرام کو بھی آن لائن ڈائریکٹری سے نکال دیا تھا، جبکہ میٹا کی دیگر ایپس فیس بک اور انسٹاگرام تک رسائی ناممکن کر دی گئی ہے۔ یوٹیوب پر بھی پابندی عائد کی گئی ہے، تاہم یہ واضح نہیں کہ اسے مکمل طور پر آن لائن ڈائریکٹری سے خارج کیا گیا ہے یا نہیں۔