واشنگٹن: سفیرِ پاکستان کی انسپائر برانڈز کی اعلیٰ قیادت سے ملاقات

امریکا میں سفیرِ پاکستان رضوان سعید شیخ نے امریکا کی معروف ملٹی برانڈ ریسٹورنٹ کمپنی انسپائر برانڈز کے چیف آپریٹنگ آفیسر فرینک سکل اسمتھ اور گورنمنٹ افیئرز کی سربراہ ایشلے کونیف سے ملاقات کی۔ ملاقات میں کمپنی کی عالمی اور بالخصوص پاکستان میں جاری کاروباری سرگرمیوں پر تفصیلی تبادلۂ خیال کیا گیا۔

• انسپائر برانڈز امریکامیں ریسٹورنٹ بزنس سے وابستہ دوسری بڑی کمپنی ہے، جو دنیا کے ساٹھ ممالک میں 33 ہزار سے زائد ریسٹورنٹس کا انتظام سنبھالے ہوئے ہے، جبکہ ساڑھے چھ لاکھ سے زائد کمپنی اور فرنچائز ممبران اس نیٹ ورک سے وابستہ ہیں۔ کمپنی کے دو بڑے برانڈز باسکن رابنز اور ڈنکن اس وقت پاکستان میں کامیابی کے ساتھ اپنی کاروباری سرگرمیاں جاری رکھے ہوئے ہیں۔
  کمپنی انتظامیہ نے سفیرِ پاکستان کو اپنی مجموعی کاروباری حکمتِ عملی اور خصوصاً پاکستان سے متعلق بزنس پر تفصیلی بریفنگ دی۔ اس موقع پر سفیرِ پاکستان نے باسکن رابنز اور ڈنکن کی پاکستان میں موجودگی اور کامیاب کاروباری سرگرمیوں پر اطمینان کا اظہار کیا۔
  رضوان سعید شیخ نے کہا کہ پاکستان اپنی معاشی استعداد، بڑی آبادی اور منفرد جغرافیائی محلِ وقوع کی بدولت امریکی سرمایہ کاروں کے لیے ایک پرکشش مقام ہے۔ ملاقات میں پاکستان میں انسپائر برانڈز کی کاروباری سرگرمیوں کو مزید وسعت دینے، پاکستانی ریسٹورنٹس کو امریکا میں متعارف کرانے اور پاکستان کو حلال مصنوعات کے علاقائی مرکز کے طور پر فروغ دینے پر بھی گفتگو ہوئی۔
  سفیرِ پاکستان کا کہنا تھا کہ اپنے منفرد جغرافیائی محلِ وقوع کے باعث پاکستان خلیجی ریاستوں، مشرقِ وسطیٰ اور وسطی ایشیا کی کاروباری ضروریات پوری کرنے کی بھرپورv صلاحیت رکھتا ہے۔ انہوں نے اس عزم کا اظہار کیا کہ پاکستان انسپائر برانڈز کے ساتھ باہمی طور پر سودمند اور مثبت نتائج پر مبنی تعاون کا خواہاں ہے