مجھے اغوا کیا گیا، وینزویلا کا صدر ہوں، الزامات بے بنیاد ہیں: مادورو کا عدالت میں بیان

وینزویلا کے صدر نکولس مادورو نے امریکی عدالت میں پیشی کے دوران منشیات اور دہشت گردی سے متعلق الزامات تسلیم کرنے سے انکار کر دیا۔ مادورو نے عدالت میں مؤقف اختیار کیا کہ وہ ایک اچھے انسان ہیں، اب بھی وینزویلا کے صدر ہیں اور انہیں اغوا کر کے امریکا لایا گیا ہے۔

امریکی میڈیا کے مطابق مادورو اور ان کی اہلیہ کو بروکلن سے ہیلی کاپٹر کے ذریعے مین ہیٹن منتقل کیا گیا، جہاں سے انہیں بکتر بند گاڑی میں عدالت لایا گیا۔ مادورو کو قیدیوں کا یونیفارم پہنائے ہتھکڑیوں میں عدالت میں پیش کیا گیا اور کارروائی سمجھنے کے لیے انہوں نے ہسپانوی زبان کے ہیڈفون استعمال کیے۔

وفاقی جج کے سامنے مادورو نے تمام الزامات کو بے بنیاد قرار دیا، جبکہ ان کی اہلیہ نے بھی اپنی بے گناہی پر زور دیا۔ عدالت نے مقدمے کی مزید سماعت کے لیے مادورو اور ان کی اہلیہ کو 17 مارچ کو دوبارہ پیش ہونے کا حکم دے دیا۔