محدود ممالک کے مفادات کا تحفظ کرنے والا یک قطبی عالمی نظام ماضی کا حصہ بن رہا ہے: پوتن

روس کے صدر ولادیمیر پوتن نے برکس (BRICS) سربراہی اجلاس سے خطاب کرتے ہوئے اعلان کیا ہے کہ محدود تعداد میں ممالک کے مفادات کا تحفظ کرنے والا پرانا ’یک قطبی عالمی نظام‘ (Unipolar World Order) اب تیزی سے ماضی کا حصہ بنتا جا رہا ہے۔ انہوں نے کہا کہ اس وقت دنیا میں جغرافیائی سیاسی، اقتصادی، تکنیکی اور سماجی شعبوں میں بنیادی نوعیت کی تاریخی تبدیلیاں رونما ہو رہی ہیں، جبکہ عالمی طاقت کا توازن اب ‘عالمی جنوب’ (Global South) اور مشرق میں ابھرنے والے ترقی کے نئے مراکز کی جانب منتقل ہو رہا ہے۔

روسی صدر نے کہا کہ ابھرتی ہوئی دنیا میں بین الاقوامی تعلقات کے حوالے سے زیادہ سے زیادہ ممالک اپنے قومی مفادات کے تحفظ اور عالمی مسائل کے حل کے لیے دوٹوک مؤقف اختیار کر رہے ہیں۔ انہوں نے زور دیا کہ نئے تشکیل پاتے ہوئے ’کثیر قطبی عالمی نظام‘ (Multipolar World Order) میں حقیقی کثیرالجہتی تعاون اور مساوی شراکت داری پہلے سے کہیں زیادہ ضروری ہو گئی ہے۔ صدر پوتن کا کہنا تھا کہ بین الاقوامی سیاسی و اقتصادی اداروں، عالمی حکمرانی اور خطرات سے نمٹنے کی کوششوں میں تمام ممالک کو شامل کیا جانا چاہیے تاکہ بین الاقوامی امن، استحکام اور عالمی خوشحالی کو یقینی بنایا جا سکے۔