فلسطینیوں کی جبری بے دخلی مسترد، برکس ممالک کی دو ریاستی حل کی حمایت

برکس (BRICS) سربراہی اجلاس کے اختتام پر جاری کردہ مشترکہ اعلامیے میں ممبر ممالک نے غزہ میں فوری و مستقل جنگ بندی پر زور دیتے ہوئے فلسطینیوں کی کسی بھی قسم کی جبری بے دخلی کو مکمل طور پر مسترد کر دیا ہے اور فلسطین کے دو ریاستی حل کی صریح حمایت کی ہے۔ اعلامیے میں غزہ کی پٹی میں کسی بھی جغرافیائی یا آبادیاتی (ڈیموگرافک) تبدیلی کی سخت مخالفت کی گئی، جبکہ مقبوضہ بیت المقدس کی تاریخی و قانونی حیثیت کو تبدیل کرنے کے یکطرفہ اقدامات کو مسترد کرتے ہوئے شہر میں موجود تمام مذہبی اور مقدس مقامات کے احترام و تحفظ پر زور دیا گیا۔ اس کے علاوہ اسرائیل اور حزب اللہ کے درمیان کشیدگی کے خاتمے کے لیے اقوامِ متحدہ کی متعلقہ قراردادوں پر من و عن عمل درآمد کا مطالبہ بھی کیا گیا۔

برکس رہنماؤں نے عالمی تنازعات کو مذاکرات اور سفارت کاری کے ذریعے حل کرنے پر زور دیتے ہوئے یکطرفہ تجارتی پابندیوں اور اضافی محصولات کو تنقید کا نشانہ بنایا، جبکہ جوہری جنگ کے بڑھتے ہوئے خطرات اور جنگی حالات میں ایٹمی تنصیبات کے تحفظ پر شدید تشویش ظاہر کی۔ دوسری جانب چینی صدر شی جن پنگ نے اجلاس سے خطاب کرتے ہوئے کہا کہ مشرقِ وسطیٰ اور خلیجی خطے کی جنگ نے عوام کو ناقابلِ تلافی نقصان پہنچایا ہے اور اس کا جاری رہنا عالمی برادری کے مفاد میں نہیں۔ انہوں نے زور دیا کہ برکس ممالک کو دوسرے ممالک کے اندرونی معاملات میں مداخلت کے بغیر عالمی امن و استحکام کے لیے اپنا متحرک اور قائدانہ کردار ادا کرنا چاہیے۔