فوجی صلاحیتیں دشمن کی توقعات سے کہیں زیادہ، قومی مفادات پر سمجھوتہ نہیں کریں گے: سربراہ ایرانی فوج

ایرانی مسلح افواج کے سربراہ میجر جنرل امیر حاتمی نے اپنے تازہ ترین بیان میں عزم ظاہر کیا ہے کہ ایران اپنے اعلیٰ قومی مفادات اور دفاع پر کسی بھی قسم کا سمجھوتہ نہیں کرے گا اور ملک کی دفاعی و فوجی صلاحیتیں دشمن کے تمام تخمینوں اور توقعات سے کہیں زیادہ مضبوط ہیں۔ انہوں نے متنبہ کیا کہ ایران کی سرحدوں یا خود مختاری کے خلاف کی جانے والی کسی بھی جارحیت کا فوری، مؤثر اور بھرپور جواب دیا جائے گا، جبکہ ایرانی فوج نے خطے میں قابض اور دہشت گرد طاقتوں کے عزائم کو ناکام بنا کر انہیں پیچھے ہٹنے پر مجبور کیا ہے۔

میجر جنرل امیر حاتمی نے وائٹ ہاؤس کے رویے کو آڑے ہاتھوں لیتے ہوئے کہا کہ امریکی قیادت اور ان کے فیصلے بے بسی، ناامیدی اور واضح مایوسی کا پتہ دیتے ہیں۔ انہوں نے دعویٰ کیا کہ امریکی حکام اپنی سفارتی و حکمتِ عملی کی ناکامیوں اور شکست کو چھپانے کے لیے اپنے عوام کے سامنے حقائق کو مسخ کر رہے ہیں۔ ایرانی فوجی سربراہ کا مزید کہنا تھا کہ اگر امریکہ کی بلا مشروط اور مسلسل حمایت میسر نہ ہو تو صیہونی اسرائیلی فوج میں زیادہ عرصے تک قائم رہنے اور مقابلہ کرنے کی صلاحیت ہی موجود نہیں ہے۔