ریاست کے خلاف بندوق اٹھانے والوں سے بات چیت نہیں ہوگی: وزیراعلیٰ بلوچستان

وزیراعلیٰ بلوچستان میر سرفراز بگٹی نے واضح الفاظ میں اعلان کیا ہے کہ ریاست کے خلاف بندوق اٹھانے والے عناصر کے ساتھ کسی صورت کوئی بات چیت یا مذاکرات نہیں ہوں گے۔ کوئٹہ میں ویڈیو لنک کے ذریعے صحافیوں کے وفد سے گفتگو کرتے ہوئے ان کا کہنا تھا کہ صوبے میں جب تک آخری دہشت گرد موجود ہے، اس وقت تک دہشت گردی کے خلاف جنگ پوری طاقت اور عزم کے ساتھ جاری رہے گی۔

سرفراز بگٹی نے صوبائی حکومت کی پالیسی اور ترجیحات کی وضاحت کرتے ہوئے کہا کہ بلوچستان میں دہشت گردی کا خاتمہ سول اور عسکری قیادت کا مشترکہ ہدف ہے، اور اس معاملے میں دونوں قیادتیں مکمل طور پر متفق، یکسو اور ہمنوا ہیں۔ انہوں نے مزید کہا کہ سیکیورٹی فورسز انتہائی سخت اور نامساعد حالات کے باوجود اپنے فرائض سرانجام دے رہی ہیں اور تمام ریاستی ادارے آپسی ہم آہنگی سے کام کر رہے ہیں۔ انہوں نے زور دیا کہ دہشت گردی کے خلاف قائم ریاستی پالیسی میں کسی قسم کا ابہام یا کنفیوژن موجود نہیں ہے۔