وفاقی کابینہ نے ویزا کلیئرنس نظام کی منظوری دے دی

اسلام آباد: وفاقی کابینہ نے وزارت داخلہ کی سفارش پر ویزا کلیئرنس نظام کی منظوری دے دی۔ اجلاس منگل کو وزیراعظم شہباز شریف کی صدارت میں ہوا، جس میں نیشنل کینبیز کنٹرول اینڈ ریگولیٹری پالیسی 2025 کو بھی حتمی شکل دی گئی۔

اعلامیے کے مطابق، ویزا کلیئرنس نظام کا مقصد بیرون ملک جانے والے پاکستانیوں کے لیے شفاف اور محفوظ طریقے سے ویزے کے حصول کو آسان بنانا ہے۔ نیشنل کینبیز پالیسی کا مقصد ملک میں فارماسوٹیکل اور ٹیکسٹائل سیکٹر میں نباتاتی پودوں کے استعمال کو فروغ دینا ہے۔

کابینہ نے اقتصادی رابطہ کمیٹی کے 18 دسمبر کے اجلاس میں کیے گئے فیصلوں کی بھی توثیق کی۔ وزیراعظم نے کہا کہ حکومت سیاسی ہم آہنگی کے لیے تمام جماعتوں سے مذاکرات کے اصولی موقف پر قائم ہے اور ذاتی طور پر متعدد بار مذاکرات کی پیشکش کی جا چکی ہے۔ انہوں نے واضح کیا کہ مذاکرات کی آڑ میں امن و امان خراب کرنے کی کسی کوشش کو کامیاب نہیں ہونے دیا جائے گا۔