میرپور ڈویژن کے عوام نے ن لیگ کی کارکردگی پر اعتماد کا اظہار کیا، عظمیٰ بخاری

وزیر اطلاعات پنجاب عظمیٰ بخاری نے پریس کانفرنس کرتے ہوئے کہا ہے کہ آزاد کشمیر کے انتخابی نتائج عوام کا حقیقی فیصلہ ہیں اور لوگوں نے مسلم لیگ (ن) کی کارکردگی پر کامل اعتماد کا اظہار کیا ہے۔ انہوں نے مخالفین کو نتائج کھلے دل سے تسلیم کرنے کا مشورہ دیتے ہوئے پیپلز پارٹی کے رہنماؤں کے بیانات کو غیر جمہوری اور افسوسناک قرار دیا۔ عظمیٰ بخاری نے دعویٰ کیا کہ وزیراعلیٰ مریم نواز کی قیادت میں گزشتہ 18 ماہ کے دوران ‘ستھرا پنجاب’ اور بارشوں کے دوران بروقت نکاسیِ آب سمیت نمایاں ترقیاتی منصوبے مکمل کیے گئے ہیں۔ انہوں نے پیپلز پارٹی کی قیادت بالخصوص بلاول بھٹو زرداری کو پنجاب کے دورے کی دعوت دیتے ہوئے کہا کہ الزام تراشی کے بجائے کراچی اور سندھ کی ابتر صورتحال پر توجہ دی جائے جبکہ پنجاب بھر بشمول جنوبی پنجاب ترقیاتی کارکردگی کی روشن مثال قائم کر رہا ہے۔