ازبک نائب وزیراعظم کے دورہ پاکستان کیلئے تیاریوں کا جائزہ اجلاس

وفاقی وزیر برائے اقتصادی امور احد چیمہ کی زیرِ صدارت ایک اعلیٰ سطح کا اجلاس منعقد ہوا، جس میں ازبکستان کے نائب وزیراعظم جمشید خوجایوف کے آئندہ دورۂ پاکستان کی تیاریوں کا تفصیلی جائزہ لیا گیا۔ اجلاس کے دوران وفاقی وزیر کو بریفنگ دی گئی کہ ازبکستان کے نائب وزیراعظم 20 اور 21 جولائی کو پاکستان کا سرکاری دورہ کریں گے، جس کے دوران دونوں ممالک کے مابین 5 سالہ اقتصادی تعاون کے روڈ میپ پر دستخط متوقع ہیں۔

وفاقی وزیر احد چیمہ نے اس عزم کا اظہار کیا کہ ازبک نائب وزیراعظم کا یہ دورہ دوطرفہ تجارتی و اقتصادی شراکت داری میں ایک اہم سنگ میل ثابت ہوگا اور اس 5 سالہ روڈ میپ کی مدد سے باہمی تجارت، سرمایہ کاری اور علاقائی روابط کو ایک نیا فروغ ملے گا۔ انہوں نے تمام متعلقہ وزارتوں کو دورے کی تیاریاں بروقت اور فول پروف بنانے کی ہدایت دی اور بتایا کہ اس موقع پر پاک-ازبک بزنس ٹو بزنس (B2B) فورم بھی منعقد کیا جائے گا، جس میں ازبکستان کی 100 سے زائد بڑی کمپنیاں شرکت کر کے زراعت، ادویات، لاجسٹکس، ٹرانسپورٹ اور صنعتی شعبوں میں سرمایہ کاری پر تبادلہ خیال کریں گی۔ اجلاس میں پاکستان اور ازبکستان کے درمیان سڑک اور ریل نیٹ ورک کو بہتر بنانے اور لاجسٹکس ڈھانچے کو مضبوط کرنے کی تجاویز کا بھی جائزہ لیا گیا، جس میں معاون خصوصی ہارون اختر خان، سیکرٹری خارجہ آمنہ بلوچ اور دیگر اعلیٰ حکام نے شرکت کی۔