ایرانی بعض اوقات ایسے وعدے کرتے ہیں جنہیں وہ پورا نہیں کرتے: جے ڈی وینس

ایران کے ساتھ پیدا شدہ کشیدہ صورتِ حال اور غیر یقینی پر گفتگو کرتے ہوئے امریکی نائب صدر جے ڈی وینس (JD Vance) نے ایران پر عہد شکنی کا الزام عائد کرتے ہوئے کہا ہے کہ ایرانی حکام اکثر ایسے وعدے کرتے ہیں جنہیں وہ بعد میں پورا نہیں کرتے اور معاہدے کرنے کے باوجود ان پر عملدرآمد سے گریز کرتے ہیں۔ ‘فاکس نیوز’ کو دیے گئے ایک انٹرویو میں انہوں نے دعویٰ کیا کہ وہ پورے اعتماد کے ساتھ کہہ سکتے ہیں کہ اس تمام معاملے کا اختتام امریکا کی مضبوطی کی صورت میں ہوگا، جہاں ایران جوہری ہتھیاروں سے محروم ہوگا اور آبنائے ہرمز میں عالمی تیل و گیس کی سپلائی بحال رہنے سے امریکی عوام کے لیے توانائی کی قیمتیں مستحکم رہیں گی۔

ایران کے خلاف امریکا کی بدلتی ہوئی حکمتِ عملی سے متعلق سوال کے جواب میں جے ڈی وینس نے بتایا کہ امریکا کے پاس اپنے مقاصد کے حصول کے لیے متعدد ذرائع اور آپشنز موجود ہیں۔ انہوں نے کہا کہ کبھی امریکی توجہ توانائی اور پیٹرولیم کی قیمتوں میں استحکام پر ہوتی ہے، کبھی عسکری اقدامات پر زور دیا جاتا ہے تو کبھی ایران کے جوہری پروگرام کی روک تھام پر۔ امریکی نائب صدر کے مطابق ٹرمپ انتظامیہ اپنے تمام وسائل حکمتِ عملی کے ساتھ استعمال کر رہی ہے، اور امریکا اپنے دونوں بنیادی اہداف—تیل و گیس کی قیمتوں کا استحکام اور ایران کو ایٹمی طاقت بننے سے روکنا—حاصل کرنے میں کامیاب ہو رہا ہے۔