امریکی حملے میں فوجی اہلکاروں اور عام شہریوں سمیت 40 افراد ہلاک ہوئے، وینزویلا کا دعویٰ

وینزویلا کے ایک اعلیٰ سرکاری عہدیدار نے دعویٰ کیا ہے کہ امریکا کی جانب سے کیے گئے حالیہ حملوں میں فوجی اہلکاروں اور عام شہریوں سمیت 40 افراد ہلاک ہوئے ہیں۔

امریکی اخبار نیو یارک ٹائمز کے مطابق وینزویلا کے ایک سینئر عہدیدار نے نام ظاہر نہ کرنے کی شرط پر بتایا کہ یہ حملے ہفتے کی علی الصبح کیے گئے، جن میں شہری آبادی کے ساتھ ساتھ فوجی تنصیبات کو بھی نشانہ بنایا گیا۔

دوسری جانب امریکی صدر ڈونلڈ ٹرمپ نے فوکس نیوز سے گفتگو کرتے ہوئے کہا کہ اس کارروائی میں کوئی امریکی فوجی ہلاک نہیں ہوا، تاہم ان کا کہنا تھا کہ آپریشن کے دوران متعدد امریکی فوجی زخمی ہوئے ہیں۔

ادھر امریکی جوائنٹ چیفس آف اسٹاف کے چیئرمین جنرل ڈین کین نے پریس کانفرنس میں بتایا کہ وینزویلا کے صدر نکولس مادورو اور ان کی اہلیہ کو نکالنے کے لیے امریکی ہیلی کاپٹروں نے کارروائی کی۔ ان کے مطابق آپریشن کے دوران ایک امریکی ہیلی کاپٹر کو نشانہ بنایا گیا، تاہم وہ پرواز کے قابل رہا اور تمام امریکی طیارے بحفاظت واپس لوٹ آئے۔

واضح رہے کہ امریکی فوج نے ایک روز قبل وینزویلا کے دارالحکومت سمیت مختلف مقامات پر حملے کیے تھے، جن کے بعد صدر نکولس مادورو اور ان کی اہلیہ کو گرفتار کر کے نیویارک منتقل کیے جانے کا اعلان کیا گیا تھا۔

اس حوالے سے روسی میڈیا نے بھی دعویٰ کیا تھا کہ امریکی حملوں میں وینزویلا کے دفاعی ہیڈکوارٹرز کو نشانہ بنایا گیا، جبکہ صدر مادورو صدارتی محل چھوڑ کر روانہ ہو گئے تھے۔