امریکا میں بے روزگاری 4 سال کی بلند ترین سطح پر، لیبر مارکیٹ دباؤ کا شکار

امریکا میں نومبر کے دوران بے روزگاری کی شرح بڑھ کر 4.6 فیصد ہو گئی جو گزشتہ چار برس کی بلند ترین سطح ہے۔ امریکی محکمہ محنت کے مطابق ستمبر میں بے روزگاری کی شرح 4.4 فیصد تھی۔

رپورٹ کے مطابق نومبر میں 64 ہزار نئی ملازمتیں پیدا ہوئیں جو ماہرین کی توقعات سے زیادہ ہیں، تاہم اکتوبر میں وفاقی ملازمتوں میں بڑی کمی کے باعث مجموعی طور پر لیبر مارکیٹ کمزور دکھائی دے رہی ہے۔

اعداد و شمار میں بتایا گیا ہے کہ اکتوبر میں 1 لاکھ 5 ہزار ملازمتیں ختم ہوئیں، جن میں 1 لاکھ 62 ہزار وفاقی سرکاری نوکریاں شامل تھیں، یہ کمی حکومتی اخراجات میں کٹوتی کے فیصلوں کا نتیجہ تھی۔

امریکی مرکزی بینک فیڈرل ریزرو کو ایک طرف کمزور ہوتی لیبر مارکیٹ جبکہ دوسری جانب بڑھتی مہنگائی جیسے دباؤ کا سامنا ہے۔ فیڈ نے گزشتہ ہفتے شرح سود میں 0.25 فیصد کمی کی، تاہم حکام کے درمیان آئندہ پالیسی پر اختلاف برقرار ہے۔

رپورٹ میں یہ بھی انکشاف ہوا ہے کہ طویل مدت سے بے روزگار افراد کی تعداد بڑھ کر 19 لاکھ ہو گئی ہے، جو لیبر مارکیٹ میں بڑھتی غیر یقینی صورتحال کی نشاندہی کرتی ہے۔

ماہرین کے مطابق حکومتی شٹ ڈاؤن اور ڈیٹا میں تاخیر کے باعث اعداد و شمار مکمل طور پر واضح تصویر پیش نہیں کرتے، تاہم بے روزگاری میں اضافہ فیڈ کے لیے تشویش کا باعث بن سکتا ہے۔