امریکا کے بڑے ٹی وی نیٹ ورکس کا ٹرمپ کی کوریج پر پابندی کا فیصلہ

امریکی صدر ڈونلڈ ٹرمپ کی جانب سے تین ممتاز خبری اداروں کے صحافیوں کے وائٹ ہاؤس میں داخلے پر پابندی عائد کیے جانے کے بعد امریکی میڈیا اور انتظامیہ کے درمیان شدید تصادم پیدا ہو گیا ہے۔ وائٹ ہاؤس کی اس کارروائی کے ردِعمل میں امریکا کے تمام بڑے ٹی وی نیٹ ورکس نے یکجہتی کا مظاہرہ کرتے ہوئے صدر ٹرمپ کی ٹی وی پول کوریج کا بائیکاٹ کرنے اور معطل کرنے کا اعلان کر دیا ہے۔ یہ بحران اس وقت شروع ہوا جب وائٹ ہاؤس کی جانب سے ‘سی این این’ (CNN)، ‘ایم ایس ناؤ’ (MS NOW) اور ‘پولیٹیکو’ (Politico) کے صحافیوں کو دی گئی پریس کریڈنشلز (داخلے کے پاسز) منسوخ کر کے انہیں وائٹ ہاؤس میں داخل ہونے سے روک دیا گیا۔ صدر ٹرمپ نے صحافیوں کے پاسز منسوخ کرنے کی کوئی مخصوص وجہ بتائے بغیر دیگر ناقد اداروں کو بھی ایسی ہی پابندیوں کی دھمکی دی ہے۔

اس یکجہتی کے پیشِ نظر فاکس نیوز، اے بی سی نیوز، سی بی ایس نیوز، این بی سی نیوز اور سی این این نے ایک مشترکہ اعلامیہ جاری کیا ہے۔ اعلامیے میں موقف اختیار کیا گیا ہے کہ جمہوری معاشرے اور عوام کے بہترین مفاد کے لیے ضروری ہے کہ وہ حکومت کے کام کاج سے متعلق درست اور آزادانہ معلومات حاصل کریں۔ بیان میں واضح کیا گیا کہ کسی بھی صدارتی انتظامیہ کو نیوز آرگنائزیشنز کی رسائی صرف اس بنیاد پر سلب یا محدود نہیں کرنی چاہیے کہ وہ ادارے حکومت پر تنقید کرتے ہیں۔ اس یکجہتی کے نتیجے میں وائٹ ہاؤس ٹی وی پول نے فیصلہ کیا ہے کہ وہ صدر کی پول کوریج میں حصہ نہیں لیں گے۔ دوسری جانب متاثرہ تینوں خبر رساں اداروں نے آئین کی پہلی ترمیم (First Amendment) اور بنیادی حقوق کی خلاف ورزی پر ٹرمپ انتظامیہ کے خلاف واشنگٹن کی وفاقی عدالت میں باقاعدہ مقدمہ دائر کر دیا ہے۔