ٹرمپ جوہری پروگرام پر ٹھوس اقدامات کے بدلے ایران کو اقتصادی ریلیف دینے کیلئے تیار

امریکی حکام کی جانب سے سامنے آنے والی تازہ ترین رپورٹس کے مطابق صدر ڈونلڈ ٹرمپ ایران کی جانب سے اپنے جوہری پروگرام سے متعلق ٹھوس اور عملی اقدامات اٹھانے کی صورت میں اس پر عائد سخت اقتصادی پابندیاں نرم کرنے اور مختلف ممالک میں منجمد ایرانی فنڈز بحال کرنے کے لیے تیار ہیں۔ امریکی خبر رساں ادارے ’ایگزیوس‘ (Axios) کے مطابق، یہ اہم سفارتی پیش رفت ایک ایسے وقت میں سامنے آئی ہے جب قطری اور پاکستانی ثالث روانہ ہفتے دونوں ممالک کے درمیان جاری شدید کشیدگی کم کرنے اور ممکنہ معاہدے کی راہ ہموار کرنے کے لیے متحرک ہیں۔ اس کے باوجود فریقین کے بنیادی نکات اور ترجیحات پر اب بھی شدید اختلافات موجود ہیں؛ جہاں ایران مذاکرات کا تمام تر محور آبنائے ہرمز کی صورتحال اور امریکی بحری ناکہ بندی کو بنانا چاہتا ہے، وہیں ٹرمپ انتظامیہ کی جانب سے بنیادی مطالبہ ہے کہ ایران اپنے جوہری پروگرام پر واضح اور اہم مراعات دے۔

سینئر امریکی عہدیداروں کا کہنا ہے کہ آبنائے ہرمز میں تجارتی بحری جہازوں کی نقل و حرکت میں رفتہ رفتہ اضافہ ہو رہا ہے، جبکہ ناکہ بندی اور مسلسل اقتصادی پابندیوں نے ایرانی معیشت اور سفارتی پوزیشن کو شدید متاثر کیا ہے۔ وائٹ ہاؤس کے مطابق وقت کے ساتھ امریکی پوزیشن مزید مضبوط ہو رہی ہے اور صدر ٹرمپ تحمل کا مظاہرہ کرتے ہوئے اپنے اس حتمی ہدف پر قائم ہیں کہ ایران کو کبھی بھی جوہری ہتھیار حاصل نہ کرنے دیے جائیں۔ تاہم امریکی حکام کو ایرانی وعدوں پر اب بھی شکوک و شبہات ہیں۔ ان کا موقف ہے کہ ایرانی فورسز نے ماضی میں آبنائے ہرمز میں تجارتی جہازوں پر فائرنگ کر کے سابقہ معاہدوں کی خلاف ورزی کی تھی، لہٰذا امریکہ کو اس بار ہر صورت ٹھوس اور تحریری یقین دہانی چاہیے تاکہ یہ یقینی بنایا جا سکے کہ ایران مذاکرات کے لیے واقعی سنجیدہ ہے اور محض وقتی مشکلات سے نکلنے کا راستہ تلاش نہیں کر رہا۔