امریکا کا ایران پر تاریخ کی سخت ترین پابندیاں عائد کرنے کا اعلان

امریکی وزیر خزانہ اسکاٹ بیسنٹ نے اعلان کیا ہے کہ امریکا جلد ایران پر ایسی سخت اور تاریخی معاشی پابندیاں عائد کرنے جا رہا ہے جن کی ماضی میں کوئی مثال نہیں ملتی۔ امریکی میڈیا کو دیے گئے ایک انٹرویو میں انہوں نے واضح کیا کہ ان اقدامات کا مقصد تہران کو عالمی سطح پر مکمل طور پر معاشی اور سفارتی تنہائی کا شکار بنانا ہے، اور اس سلسلے میں مزید اہم اعلانات آئندہ ہفتے متوقع ہیں۔

امریکی وزیر خزانہ کے مطابق نئی حکمت عملی کے تحت ایران پر شدید مالیاتی دباؤ بڑھانے کے ساتھ ساتھ آبنائے ہرمز سے متعلق سخت ترین پابندیاں اور ناکہ بندی کو شامل کیا گیا ہے۔ اسکاٹ بیسنٹ نے زور دے کر کہا کہ آبنائے ہرمز میں امریکا کی جانب سے ناکہ بندی کا سلسلہ مکمل طور پر برقرار رہے گا، جس کے نتیجے میں ایرانی بندرگاہوں سے کسی بھی قسم کی تجارتی سامان یا بحری جہازوں کی نقل وحرکت (آمد و رفت) مکمل طور پر مسدود ہو جائے گی۔ انہوں نے دعویٰ کیا کہ معاشی پابندیوں اور سمندری ناکہ بندی کا یہ مشترکہ امتزاج ایرانی معیشت پر شدید اثرات مرتب کرے گا۔