پاک افغان کشیدگی : امریکا کا پاکستان کی حمایت کا اعلان

امریکا نے طالبان رجیم کے خلاف پاکستان کی کھل کر حمایت کا اعلان کر دیا ہے۔

امریکی محکمہ خارجہ میں سیاسی امور کی سیکرٹری ایلیسن ہوکر نے سماجی رابطے کی ویب سائٹ پر جاری اپنے پیغام میں کہا ہے کہ امریکا افغان طالبان کی جانب سے حملوں کے خلاف پاکستان کی حمایت کرتا ہے۔

ایلیسن ہوکر کے مطابق ان کی پاکستانی سیکرٹری خارجہ آمنہ بلوچ سے ٹیلیفون پر گفتگو ہوئی جس میں خطے کی حالیہ کشیدگی اور سکیورٹی صورتحال پر تفصیلی تبادلہ خیال کیا گیا۔ انہوں نے واضح کیا کہ امریکا صورت حال کو قریب سے دیکھ رہا ہے اور پاکستان کو طالبان کی جانب سے ہونے والے حملوں کے خلاف اپنے دفاع کا مکمل حق حاصل ہے۔

ادھر اس سے قبل امریکی صدر ڈونلڈ ٹرمپ نے پاک افغان کشیدگی پر ردعمل دیتے ہوئے کہا کہ پاکستان افغانستان کے ساتھ بہتر انداز میں معاملات چلا رہا ہے اور وہ اس تنازع میں مداخلت نہیں کریں گے۔

امریکی صدر کا کہنا تھا کہ پاکستان کے پاس باصلاحیت وزیر اعظم اور جنرل موجود ہیں، جن کی قیادت قابلِ احترام ہے اور وہ ان دونوں شخصیات کی قدر کرتے ہیں۔